雙刀肌男

撰文︰陳志滔　　攝影︰郭凱敏

查詢電話︰2388 4677

賣街時王子會穿上皮革戰衣，有齊背心、長褲、護臂及長靴，跟足電影人設。

「時之砂」匕首可插於腰帶上，出廠時會追加沙漏效果。

頭雕一Take Pass

《波斯王子︰超時空之戰》由斷背仔積佳蘭賀主演，佢唔單止為部戲日操夜操，仲留鬚兼留髮，造型似乞兒多過王子。為呈現呢副猛男Look，Hot Toys特別請來韓籍頭雕師GOX出山，此君曾製作過《戰狼300》的King Leonidas，擅長雕琢粗獷猛男，今次配合大師JC Hong嘅上色技巧，基本面相與真人幾達九成相似。據知頭雕交予迪士尼及阿Jack審批時，更罕有地一Take過Pass，可見連官方亦認同其像真度。而為求盡善盡美，稍後頭髮還會改用多層軟膠製造，夠晒「動L」立體感！

背後可插雙刀，未出鞘已氣勢十足！

另備有文戲用嘅長袍、裇衫及紅色圍巾，成個Look即刻斯文晒！

沙漏匕首

素體方面，為表達阿Jack一身爆肌Look，特別選用新款Muscular Body，此素體之前喺狼人身上都用過，特點係上身包膠，下身則係傳統PVC，有肌肉感之餘又不失靈活性，即使擺高難度甫士都冇問題！至於服飾，HT玩布料已出神入化，好似文戲用啡色長袍，唔單止跟足電影嘅圓角對襟剪裁，表面仲絲印了大量波斯圖騰，比真衫還要貼身講究。

素體係狼人都用過嘅Muscular Body，但估唔到連胸毛都照搬過來，Man爆！	好多人買Figure貪配件多，呢個Figure就送兩把長刀、兩把短刀及一把匕首，Fans應該滿足。	跟盒送專用地枱及3對可換手掌。

而談到講究，不得不提貫穿成套戲嘅「時之砂」匕首，官方表示會用特別物料模仿刀柄內嘅沙漏效果，玩到咁盡，唔講仲以為係電影道具！

零售價︰$1,080

預訂價︰$1,050

推出日期︰第3季尾至第4季初

同場加映︰Mark V胸像必儲！

Iron Man係Hot Toys最受歡迎系列之一，除咗12吋Figure，半胸像都好多人Buy。繼Mark IV及War Machine後，最近終於輪到Mark V推出，唔單止「紅×銀」配色跟足電影設定，比例、細節仲比12吋更準確仔細，若買咗前兩個胸像的話，冇理由唔儲埋佢！

零售價︰$520　　預訂價︰$490

推出日期︰今年第3季