iPad電子書 睇、玩、搖都得
書展年年都排晒長龍，千辛萬苦，一嚟為咗去新書簽名會支持心愛作家，二嚟更大部分人目的係想執平書。已知有一些出版商、網上書店、電子書閱讀器廠商等，會乘着iPad當紅之勢，在今年書展發表電子書版本。詳情要等到時才公布，不過用家亦不妨先下載現有的電子書應用程式（Apps），預先感受一下用iPhone或iPad閱讀的樂趣。
撰文：陳若冰 攝影：梁偉德
漫畫．故事書
iPad個芒又大又靚，淨係用嚟睇黑白的文字實在有啲浪費，畀細路仔睇嘅童話故事書又點睇？趁着近期3D動畫風潮一浪接一浪，有公司推出可以玩的電子書，寓學習於娛樂，唔單只小朋友邊睇邊騎騎笑，連大人都玩到愛不釋手。
《飯氣劇場》
本地爆笑漫畫《飯氣劇場》，企鵝丁丁、Ma屎熊、真多Man等角色搞笑抵死，iPhone/iPad版更加入桌布、好玩相框、自創漫畫等，畀用家發揮自己的創意，仲可以在Facebook、Twitter上面同朋友分享。
《Alice for iPad》
去Apps Store搵「Alice in the Wonderland」，會顯示出十幾個相關的Apps，不過就以這個《Alice for iPad》較為特別，部分內容加入一些互動效果，例如可以用手搖動的藥丸、玻璃樽、兔仔等，每一頁都充滿驚喜。
小說‧散文類
傳統的實體書有一定重量，即使你力大如牛，都冇可能長期每日拎住十幾本書周街走！電子版就有呢個好處，一本也好，三百本也好，只要Download落iPhone、iPad，可以隨時鍾意睇邊本就睇邊本。也因為電子書減省了印刷、釘裝、發行的費用，所以價錢比簡體中文書仲要平。
《一個人》
筆名為百無禁忌的作者只有15歲，已經出過幾篇網絡小說，並立志以創作為終身職業。今次這本《一個人》短篇小說，是以日記形式寫成的一篇冒險故事，值得鼓勵和推介。連倪匡都讚這短篇「見得人」。
《長夜不眠》
身兼編劇、作家、影評人、文化研究員及大學講師的跨媒體創作人何故，新作《長夜不眠》，講述一段曖昧複雜的三角關係。何故本人更透露，今年將嘗試新書先推出電子版，再出實體版，對電子書市場充滿信心。
雜誌類
iPhone、iPad版的電子書，同Kindle一類的eBook Reader（電子書閱讀器）之間最大的分別，唔單只係彩色與黑白，更重要係前者可以加入更多互動的元素。據小道消息透露，本地已有出版社打算在書展期間，推出個別雜誌的Apps，到底會唔會做到好似《Wired Magazine》咁成功，就要拭目以待了。
《Wired Magazine》
iPad版的《Wired Magazine》價錢比一般電子書Apps貴（4.99美元），但開賣首日已賣出超過24,000本，主要原因除了內容豐富、製作精美，更獨特是雜誌加入不少互動元素，例如一些廣告可以入去睇片，部分產品更有3D圖，可以用手指360度擰來擰去，多角度睇得清清楚楚，真正突破「雜誌」的界限。
《MagV》
一個Apps只有一本雜誌嫌唔夠喉，《MagV》就可以畀你一次過睇晒多本唔同類型的雜誌，如旅遊、飲食等各種內容，包羅萬有，絕對係消閒解悶良方。iPhone版免費下載，想收藏喜愛的雜誌，則要加入成為MagV的會員先至得。
著數單撈Apps 就近醫肚
行完書展又餓又攰，梗係要食番餐飽慰勞吓自己，用iPhone開啟《OpenRice》搜尋一下灣仔有乜好嘢食之餘，記得上網Print定優惠券！
由即日至7月31日，逢星期一至五憑優惠券惠顧世紀香港酒店的Le Cafe美國生蠔自助午餐，可享有七五折優惠，並送價值$88汽水及啤酒。
行遠少少去胡忠大廈Fat Angelo's，惠顧主菜，憑優惠券即可以$1享用12吋辣肉腸薄餅一客。
本周熱榜Apps iOS4免費Apps最熱下載
第一位：iBooks
iPhone自升級iOS4後，終於有官方電子書iBooks可以睇，初登場即雄霸下載排行榜一星期冠軍，讓用家隨時到iBookstore選購暢銷書籍，擺明搶Kindle生意。不過剛開始得《Winnie the Pooh》和一些試讀書本下載，中文書只有《三國志》、《孫子兵法》等，選擇唔多。
第二位：Dropbox
想將iPhone內的文檔、影片和相片等，隨時與電腦同步，甚至傳給好友分享，《Dropbox》絕對幫到手。它除了可以開啟PDF、試算表和簡報，只要將檔案移至「Public」匣內，便可將網絡連結發給好友，只是每個Account容量得2GB，見係免費不妨試用一下。
第三位：GodFinger
唔單只工具Apps支援iOS4，連一眾新Game都陸續更新平台，好似近期勁多人下載的《GodFinger》，就支援iPhone 4的Retina Display靚芒，用隻手指創建自己的星球，邊起屋耕田賺錢、邊用圖騰施展神力，仲可以上網邀請Plus+好友，去其他星球搵人幫你賺錢。