威盡韓日龍之谷年底爭住煲

線上MMORPG遊戲《龍之谷》在韓國同日本大受歡迎，香港Gamania早前趁住登陸香港10周年紀念派對，將預計在年底推出的《龍之谷》帶到香港，仲請到兩位性感女神雷凱欣同A.Lin試玩，佢哋玩完大讚遊戲畫面靚兼且流暢度高，唔似玩緊線上遊戲，絕對係今年底長煲之作！

雷凱欣自命宅女，閒時冇嘢做就會玩Online Game，《龍之谷》都係佢杯茶。

超越MMORPG框框

韓國Eyedentity Games在08年宣布開發《龍之谷》時已經引來好大回響，到去年在韓國封測，更被譽為最具影響力的線上遊戲之一，而一個月前在日本舉行公測時錄得逾萬人上線嘅紀錄，係今年上半年日本反應最好嘅線上遊戲。《龍之谷》雖然只係一套線上MMORPG遊戲，但最正嘅地方係玩法同畫面表現都超出傳統框框，更似一套單機遊戲，畫面靚兼且擁有極佳的流暢度。遊戲採用次世代開發引擎技術，能夠做到極出色的3D視點切換及動作場面，點玩點轉都唔覺畫面遲滯同窒格；而且玩法更一改以往回合式打法，透過按「W.S.D.A」方向鍵控制角色移動及以滑鼠控制視點及攻擊動作，實時打怪，打得特別刺激！

畫面音效高水準

除了打得刺激，《龍之谷》遊戲中所有角色嘅攻擊、翻滾同跳躍動作都好有真實感，唔似某些同類型遊戲跳躍時似殭屍跳，整體表現出色，難怪連兩位性感女神試玩過都大讚。Gamania在今次派對上擺放了4台電腦試玩《龍之谷》，就算以圖像處理能力難免較弱的筆記簿電腦，都可以玩得好順。今次試玩版係日文版，收錄咗大量聲優配音嘅語音，相當有吸引力；但當然，今年稍後時候推出嘅香港版將會用上繁體中文顯示。除了試玩時嘅日語配音夠醒神外，遊戲的背景音樂同音效同樣有極高水準表現，當怪物殺到時會將調子輕鬆嘅背景音樂轉為肅殺氣氛，甚至連NPC鐵匠打鐵、鑄鐵嘅音效都巨細無遺地重現，難怪遊戲在各地都得到好評。