JC密密做半年狂賺850萬

憑警鐘胸闖出名堂的模特兒Jessica C.，來港發展不足一年已豬籠入水，單是頭半年加上七月已接的工作，收入已達八百五十萬港元，難怪她心郁郁計劃豪擲七位數字在美國買樓置業，升呢做業主！

自去年Jessica C.（JC）簽約模特兒公司Model One，正式以香港作為發展基地後，常以警鐘胸示人的她，憑Canon廣告一炮而紅，之後再下一城擔任Wacoal代言人大騷噴血身材，令人氣爆燈，火速成為模界新貴，工作不絕，荷包亦不斷進帳。單是今年首六個月連七月份已接的工作，JC出席大小活動、拍攝廣告、擔任代言人、拍Catalogue、參演MV甚至進軍影壇，收入已達港幣八百五十萬元，搖身一變成了小富婆。

JC甚受廣告商歡迎，難怪表現風騷。

JC最大心願是買屋予家人改善生活，十分孝順。

睇準秋季扑錘

賺到盆滿缽滿的JC一心想買屋予家人改善生活，早前她就趁回美國探親之際，順道在當地物色心水大屋，更計劃豪擲七位數字做業主。JC說：「雖然我唔知實際賺咗幾多錢，但我準備喺美國買屋。我從小就希望可以令屋企人生活得好啲！自我做模特兒開始，我就下定決心要儲錢買大屋畀佢哋住，依家美國嘅樓市真係低到令人驚訝，五十萬美金（約港幣四百萬）已經可以買到一幢六間房嘅獨立大屋，但喺香港用同等嘅價錢只可以買個好細嘅單位。（你會供款定一次過畀錢買？）我會供，不過我會先畀好大筆錢，咁供嘅時候就會快啲供完同輕鬆啲。」

談到有否心水時，JC說：「上次返去美國啲時間比較緊迫，我有睇過屋，有太多選擇，未決定到，而且我媽咪話到咗秋季，美國嘅樓市會仲低，叫我等到嗰時先買。」