邊揀位邊拍拖 睇3D好波
四年一度足球盛事首次有3D直播，近日仲殺到來香港，破天荒在戲院搞3D睇波，睇過的球迷都話美斯、朗尼粒粒球星彈晒出嚟，刺激過睇現場，搞到幾場分組重頭戲，3D飛一早畀人掃晒。如女友們想快人一步買次圈賽事戲票，同男友拍住拖為愛隊打氣，其實簡單幾個iPhone/iPad Apps經已幫到手，仲唔即刻單撈玩個夠？
嘉禾網站 即時更新買飛
早於今屆英超，倫敦、曼徹斯特等地已開始3D試播，球迷都話睇球星近距離3D扭波，比睇現場更爽更真實。只不過就算香港球迷一早換了3D電視，由於視頻訊號唔係3D，所以都冇得睇住。
好彩近日發行商終於同FIFA傾掂數，由數碼港接收3D衞星訊號，再串流至嘉禾海運戲院直播3D賽事，上網仲可以即時揀位訂分組賽，好似周五巴西對葡萄牙大戰，$300張飛第一日已被人掃晒，計落點都抵過飛去睇現場啦！
網址：http://www.goldenharvest.com/
iPhone Apps買飛3D戲院直播
為迎合流動一族要求，院方特別設計出iPhone Apps《嘉禾訂票快線》，讓用家隨時預訂3D賽事，好似情侶行行吓街想捧意大利場，只要揀選戲院場次，便會顯示座位表和收費。入場邊飲啤酒邊食爆穀不知幾過癮，但謹記戲院內沒有啤酒賣，自攜啤酒要先倒進紙杯內才可以帶入場。
Vuvuzela吹喇叭增現場氣氛
今屆賽事聽得最多的肯定是非洲喇叭Vuvuzela聲，別以為香港冇得玩，單在iPhone和iPad已搵到幾款免費《Vuvuzela》Apps，模擬獨有的低沉嗚嗚聲，仲可以揀埋球隊顏色。最正是今次3D戲院會送「Bong Bong棒」畀你為愛隊打氣，玩埋人浪拍得住現場氣氛。
Soccernet外國新聞分秒攞勁料
近排場場爆冷一地眼鏡碎，很多二線球隊都有超水準表現，想知道斯洛伐克、洪都拉斯等有乜料到，大可下載ESPN的《Soccernet》Apps，令手機除了備有所有球隊和賽事資料，仲會每分每秒更新外國小道消息，入場前做定功課，女友肯定讚你叻。
FIFA World Cup中場踢住等
踢到中場腳癮起，係時候拎部iPhone出來同朋友踢番場友誼波，當中EA的《2010 FIFA World Cup》是國際足協認可的世界盃足球遊戲，內裏有過百隊球隊任揀，除了可以Wi-Fi或藍芽對戰，亦可以玩單人World Cup模式，用心愛球隊殺入決賽捧盃，玩落同Xbox 360或PS3版有得揮。
撰文：鍾鎮科 攝影：張群生 模特兒：Sheena