許誠毅幫阿仔開枝散葉

記：記者

許：許誠毅

記：史力加拍到第四集，有冇新賣點？

許：當然係史力加最後一集出現大銀幕，同埋3D加IMAX。故事同第一集亦有連貫，史力加成家立室後厭倦刻板生活，回到反轉嘅世界，同費安娜重新墮入愛河。

記：有乜嘢場面係最有3D效果？

許：最特別係追逐打鬥場面，史力加坐住飛天掃把被幾百個巫婆追，飛埋鏡頭跟住又轉個彎，好有立體感；佢同公主合力追住條龍打，立體感好逼真。

加插武俠元素

記：今次唔係當聯合導演，主要負責乜嘢工作？

許：一啲打鬥場面我有參與，同埋開頭兩公婆鬧交戲，最後啲文戲我負責畫Storyboard，好似史力加犧牲自己感動費安娜，就用好多表情眼神表達，令觀眾跳番去第一集最初兩人墮入愛河嘅感覺。

記：第一集加入唔少港產武打片元素，今集有冇？

許：有，好似識吹笛個角色，佢溝通方法係吹笛，就好似六指琴魔同幽冥鬼手咁，攞兩支笛出嚟嗰陣似掹槍，將支笛合埋一齊似武俠片，呢場戲亦由我畫。

記：你最擅長係武打戲？

許：咁又唔係，反而我最擅長係文戲，尤其是史力加同費安娜文戲嘅關口，Storyboard多數都係我畫，點解？因為我對佢兩個角色太熟悉啦！

主題珍惜擁有

記：套戲講到史力加中年危機，係唔係你哋同導演嘅投射？

許：雖然我哋都步入中年，但套戲冇呢樣嘢投射。其實係想講「珍惜擁有嘅嘢」係最重要。

記：史力加系列要告別大銀幕，你有冇唔捨得？

許：當然好唔捨得，98年開始足足有十二年，簡直睇住佢大。但係我未同佢完全斷絕晒，之後我哋會製作以貓俠（Puss in Boots）做主角嘅電影；間中亦會製作《史力加》電視版。

感動病童囚犯

記：四集之中有乜嘢場面最鍾意？

許：好多，親手做嘅場面，好似第一集最後費安娜變醜唔再係靚公主，史力加反而讚佢好靚，睇番好有感覺。第二集史力加同費安娜本來可以保住靚樣，但費安娜唔想，佢話想見番以前Fall In Love嘅怪物，場戲好感人。

記：十二年歲月，最難忘又係乜嘢？

許：好多好多，第一集攞奧斯卡最佳動畫，好緊張好興奮；仲有好傷感第一集上映之後，有位動畫師意外過咗身。一班病童睇《史力加》笑到連病痛都唔記得，我就好感動。有囚犯喺監獄寄咗封信畀我，希望出獄之後跟我學動畫，都好難忘。

鄭葉英音夢工場打滾十二年

任《史力加4》監製的是另一港人鄭葉英音（Teresa Cheng），在港出世十六歲赴美留學，在夢工場打滾了十二年，曾製作《荒失失奇兵》等，她指《史4》加入更多新角色外，軟件亦同時更新，令角色皮膚質感、層次或設計都不斷進步，她透露安東尼奧班達拉斯聲演的貓俠會拍外傳，假如有好劇本，亦可能延續系列。

與Raman相識多年的她盛讚他熱心和隨和，是出色動畫師，她又指香港的動畫製作發展快，水準達國際級。

文：外娛組