Cookie Plus玩盡豬朋狗友

夏天一到，身邊女士都加入減肥大軍，一見甜食就匆匆遠離，惟獨一塊韓國製曲奇例外！說的是LG最新手機Cookie Plus，唔單止有個的骰外形，仲內置交友SNS Widgets及多個啱女仔用嘅Pocket Apps，最重要係僅售$1,580，食多塊都唔怕滯！

Cookie Plus比上一代圓潤，並追加了白同紫雙色，賣相更討好。售價︰$1,580

隨時更新Facebook

上一代Cookie番梘身形加全黑Body，全球賣出一千萬部；有見及此，進化版Cookie Plus都唔大改款，只是將厚度稍稍偷薄至11.5mm，並追加白同紫兩個色系，令女仔襯衫時更多選擇。上一代的互動3D Flash主頁保留下來，左右捽就能切換3個頁面，按實畫面又能Drag出各式Widgets。其中一款Widget叫SNS（Social Network Service），可在桌面即時更新Facebook、Twitter同Myspace嘅朋友狀態，對方講過乜立刻睇到！

朋友變Livecon公仔

LiveSquare介面係Cookie Plus另一有趣功能，玩法有些似傳統大頭貼通訊錄，只是相片換成不同Livecon公仔，例如豬仔、狗仔同大笨象等，用家可把公仔拉到桌面方便撥號，日後點一點公仔圖案，又可以翻查過住的通話及短訊紀錄，既方便又夠晒Funky！為咗氹女仔開心，還內置6款Pocket Apps，包括電子走馬燈、吹蠟燭遊戲及體重管理員等，後者只要輸入身高及體重，便能計算出BMI值及脂肪比例，女仔照住嚟減肥包冇死！

機背設計略嫌普通，而左上角的鏡頭像素亦只有300萬，現時標準來說唔合格。	用USB來充電同過資料，屬LG手機傳統。	上代僅有11.9mm已堪稱輕巧，如今再減多0.4mm，好薄！
首頁橫跨3版，打開下方工具列，就能把各式Widgets拉到桌面備用。	只要輸入體重及身高，體重管理員便能計算出理想BMI值同脂肪比例。	LiveSquare將朋友變晒做可愛動物，名正言順係豬朋狗友。