梁詠琪獲伊健暗送祝福
梁詠琪（GiGi）剛甩拖不久，被指有新戀情，她澄清只是有追求者但不是拍拖，稍後她將忙於出新碟，短期內也不會發展新戀情。對於前男友鄭伊健本打算致電給她一事，GiGi謂兩人甚少聯絡但會在心裏互相祝福。
早前到過墨西哥的GiGi，昨日以一身健康膚色出席香港原創品牌「Object+於香港‧設計廊」開設新售賣點活動。曾修讀設計的GiGi，對本地設計十分支持。
有人追唔係拍拖
GiGi已回復單身，日前有報道指她有新戀情，她澄清說：「唔係有新戀情，當日係個記者輕輕咁問我有冇人追，我就輕輕咁答佢話有，不過唔係拍拖。都唔好用個追字，係男仔女仔朋友出嚟見面食飯，係朋友間嘅約會。咁對方係中國人，大家比較同聲同氣啲。（有冇潛質發展？）短期內，七、八月都唔會，我要忙於出新碟嘅工作，拍拖方面要休息下。」GiGi透露和前男友Sly還有聯絡，大家是朋友關係。
祝GiGi開花結果
GiGi另一前男友鄭伊健前晚出席活動時，表示知她甩拖本想致電給她，可是看到她有新戀情的報道才打消致電的念頭，還送上祝福說：「咁咪好囉，都祝福佢，希望佢開花結果啦。」而GiGi聽罷則說：「咁得意？我哋好少聯絡，但心裏會互相祝福對方。」
另外，同場還有名模Mandy Lieu、黃家諾前女模女友Marcella及丁子高（Real）等，Real透露最近忙於籌備和老婆楊千嬅的婚禮，正在物色拍婚紗照的地方，首選是日本，因當地有很多二人的回憶，而他曾去讀書的新西蘭亦理想。
Real說：「我想搵多啲贊助。做公關，搵贊助係我強項，我六年前入呢行可能都係為咗今日！」
文：名人組