Alan Wake大玩美劇驚慄夠照
「Alan Wake」話出都有5年時間，搞咁耐到底葫蘆裏賣乜嘢藥？開發單位Remedy就用上陰森氣氛為主嘅驚慄故事包裝，加上要先用光射走敵人身上黑影先可再開火嘅射擊系統，確有相當新鮮感。難怪從芬蘭遠道而來嘅製作人Oskari Hakkinen話市面上冇遊戲引擎啱用，要從零開發，雖然等得耐，但睇見遊戲入面出色嘅光影效果，值晒！
故事鋪排似美劇
「Alan Wake」嘅驚慄故事鋪排加上類似打喪屍式嘅射擊玩法，初時覺得都幾難夾得埋，但玩落剛好相反。遊戲講述主角Alan Wake為一個驚慄小說暢銷作家，一心一意諗住帶老婆去旅行找尋寫作靈感，點知老婆突然失蹤，仲發現自己成為自己即將所寫小說嘅主角，好鬼荷李活橋段。而遊戲劇情同表達手法都幾創新，當中會加入主角內心獨白，又會從重讀蒐集到嘅小說「原稿」組織出故事，而且幾章故事入面都各有主題同高潮位，兼且有伏線預告下一集，十足睇緊美劇，連遊戲製作人都話有從劇集《Lost》中搵靈感。
陰森氣氛取勝
遊戲以驚慄做包裝，不過就唔係日式遊戲賣弄血腥、穿腸甩頭嘅場面，主要係以陰森氣氛取勝，主角大部分時間都處身黑夜兼街燈唔多嘅地方。「Alan Wake」出場嘅怪物唔係面目猙獰嘅喪屍，而係畀一團黑影遮住嘅人類，要擊退佢哋就要先用光照走身上嘅黑影，再用武器直接攻擊真身，所以無時無刻都見到主角揸住支電筒周圍走。不過電筒覆蓋範圍有限，被一大團「黑影」圍住都幾麻煩，尤其佢哋識用各式武器外，亦曉得隔空取物，或將家具、汽車當成武器襲擊玩家，所以見到場景上有大型照射燈，甚至係汽車上嘅頭燈都唔好放過利用的機會。唔知大家又估唔估到遊戲中最好用嘅武器係乜？原來係閃光彈同信號彈，因為可以一次過令大量「黑影」現真身。
優先預訂限定版送潮Tee
在標準版之外，「Alan Wake」仲會出限定版，當中有齊包括主角所寫小說共144頁「The Alan Wake Files」、限定版Soundtrack、製作花絮以及獨有遊戲內導賞功能，製作人員會在畫面彈出親身解說及作出提示，認真搞鬼。5月13日前預訂限定版仲可得到下載卡，下載別注版Avatar同主題，兼且有「I am Awake」潮Tee送，抵。
類型：驚慄動作
開發：Remedy Entertainment
平台：Xbox 360
推出日期：5月18日
售價：$309（標準版）、$349（限定版）
查詢電話：3071 4868
撰文、部分攝影：布偉倫