香港藝人上下一心早排為咗玉樹，齊集電台錄製賑災主題曲，當中就包括男子組合Square，五子為慈善出力錄到凌晨先有得走，歌迷除咗響應籌款夾埋啲零用錢捐助災民之外，仲寸步不離企喺電台門外等候，實行出錢出力為偶像打氣。
撞啱嗰晚天氣突然轉凍，成員何尚謙（James）出到門口見到歌迷為咗等佢吹咗成晚西北風，真係心都痛埋。James除咗叫佢哋快啲返屋企之外，仲即刻除件外套畀個着件T恤嘅歌迷保暖，叫個歌迷下次出席活動先畀番佢，嘩！認真夠晒細心呀，抵個歌迷等你成晚！