何超儀彭浩翔火星撞地球
山羊座的何超儀遇上處女座的彭浩翔，兩個唯美主義者，同樣性格固執，合作拍戲出現不少摩擦，幸好最後能取得共識，電影亦能順利上映，經此一「役」，二人還是不是朋友？超儀說：「朋友嚟嘅……應該都係！」而彭浩翔則說：「唔講得上！」
何超儀斥資開拍首部電影《維多利亞壹號》，題材敏感、充滿血腥暴力，極具爭議性，為她開設的852公司打響了頭炮。超儀坦言公司喜歡邊緣性的商業東西，但日後不排除有其他題材作品面世，最重要的是給觀眾新鮮感和驚喜。
監製導演存在矛盾
超儀首部作品找來鬼才導演彭浩翔合作，相當配合公司電影的基本理念，但兩個唯美主義者在一起，即傳出不和消息，有說超儀要求找荷里活級人馬為電影作後期剪片，但彭浩翔則企硬要親自操刀，二人爭持不下，令電影陷入了僵局。超儀坦承二人在意見上曾經出現矛盾，她說：「佢做嘢好投入，我明白佢所做一切都係想搞好部戲。其實冇嘢，呢個係監製同導演永遠都存在嘅矛盾，後來大家都明白，講到尾都係為咗件事好，電影唔係個人嘅事，最後冇事啦，跟咗佢個方案去做。」
超儀做事硬朗果斷，彭浩翔亦同樣有藝術家的主見，兩人走在一起摩擦在所難免，不過超儀卻另有睇法：「其實正常嘅，我山羊座佢處女座，大家都係唯美主義者，佢仲犀利啲，仲完美過我，其實咁諗都幾放心架！佢咁唯美，我仲有咩好擔心？大家可以將最好嘅嘢拎出嚟。」
至於日後會否再與彭浩翔再合作？超儀則帶點保留說：「唔知，如果佢有好題材都會想架。」問到「朋友」一詞是否適合形容二人的關係，爽朗的超儀直說：「朋友嚟嘅……應該都係。」
「仁神術」洗滌心靈
火爆何超儀說話直腸直肚，被視為圈中敢言強悍一族，今日眼前的她卻變得溫柔高雅，談吐大方得體猶如脫胎換骨，她承認自己隨着時間改變了不少，她說：「年紀大咗、成熟咗，好多事都睇通咗，其實我依家都火爆，不過收埋喺裏面，同埋結咗婚，人生走向咗另一個階段。好似早前做個舞台劇，有句對白係『你樣樣嘢都斤斤計較，冇人會去愛你架！』愛要無條件付出，唔怕蝕底，其實我對其他人同朋友都要係咁。」超儀好友陳奕迅曾以「仁神術」洗滌心靈，原來何超儀亦有效法，令個人情緒得以穩定。
彭浩翔形容與何超儀是保持着一個健康關係，但是否朋友則「唔講得上。」對於不和傳聞，他以導演身份去理解整件事，他說：「其實係佢公司對製作上唔熟悉啫，有時佢哋睇rough cut有啲嘢以為冇，其實要用時間做出嚟，最終係會有出現嘅，唔需要太緊張。」
編劇出身零舍執着
外傳彭浩翔曾緊張得要菲林鎖在夾萬內，鬼馬的他幽默地說：「如果段片唔可以剪，係唔需要收埋喺夾萬……邊有咁誇張，我實在冇一個夾萬收嘢，啲片一直喺後期公司，啲片係必須跟程序、設定去做。」超儀在電影上分別是女主角，但同時又是投資者，拍攝時出現意見分歧，兩者身份可能出現尷尬，彭浩翔再開玩笑：「冇乜特別大問題，我決定點剪架嘛！」
經此一役，彭浩翔坦言認識了如何與新公司合作，不過並沒有影響與超儀之間的合作關係。他更大讚超儀在《維》片中的演出，是從影以來最好一次，滿足到自己對她的要求。而何超儀亦指彭浩翔做事亦相當投入，他亦承認說：「我係編劇出身，好多嘢都好執着，好似『嘅呢』、『架嘞』，我覺得係有分別，我可以堅持同人拗半個鐘。」
粗口對白親身上陣
在電影中的連串粗口對白，來得真實令人對彭浩翔另眼相看，彭浩翔表示是意料之外，他說：「原本冇諗住用我把聲，我只係帶領住何超儀控制時間講佢嘅對白。之後諗住搵人配番，但效果唔好，所以最終決定用番我現場講嗰段。」
何超儀首次斥資拍片，力谷自己上位賣命之作，彭浩翔指她會承受不少壓力，他說：「我係一個導演，唔會因為係投資公司第幾部戲而拍好啲、拍差啲，每部電影都是獨立的，相對而言，投資者的壓力更大。」
文：影視組 化妝：孄仔 髮型：Vic Kwan@Hair Culture