FinePix HS10 30倍Zoom雀仔冇碇匿

18倍、26倍、30倍！唔係講緊紅魔鬼奪標賠率，而是Fujifilm全球首部30倍變焦的FinePix HS10長炮王終於抵港，由24mm廣角鏡頭Zoom盡720mm，去公園打雀真係手到拿來，仲可透過「抹走路人」玩相功能，將阻住鏡頭的路人甲乙丙統統抹走，一機走天涯從此變得更多玩法。

24~720mm防震變焦

依家DC仔都可做到十幾倍Zoom，作為Prosumer長炮王的HS10又怎能失色，首次採用24~720mm超變焦鏡頭，離遠幾十米範圍都可Zoom近影大頭，最適合郊遊影雀鳥和野生特寫。不過長焦距鏡頭經常會遇到手震問題，HS10為此特別注入三重防震技術，利用CMOS移位式光學防震、進階數碼防震和高ISO細膩畫質，就算冇帶腳架都可定過抬油。

Adv.模式抹走人影

每當想影輯靚風景或沙龍時，周圍總會遇到礙眼的路人和車輛行來行去，以前可能要用Photoshop執走，現在只要開啟HS10的Adv.進階功能便可抹走人影。聽落好似好神奇，其實是透過「動態消除模式」連拍5張相片進行分析，再將畫面合併移走郁動的物件。同樣原理還可將5張相片在「多重動態拍攝模式」合併玩多重曝光，輕鬆做出各種影像效果。

放大圖片

售價：$3,780

每秒10張高速連拍

Prosumer相機最大好處是兼具大機專業畫質與細機簡易操控，今次HS10除了有齊Fujifilm的SR Auto自動場景、一掃全景和400% DR動態範圍等拍攝功能，還為專業用家引入高速快門系統，就以拍攝雀鳥為例，新機可以每秒10張連拍展翅飛翔時的動感影像；而就算冇大師級反應和眼界，亦可使用「最佳畫面捕捉模式」輔助，在對焦（半按快門）時，相機便會自動記錄7張相片。　

除了常見的P、S、A、M等外，還新增Adv.進階模式和一掃全景選項。	機背按鍵設計和上代差不多，還細心地加入攝錄快捷鍵，任何時候都可一按即錄。	採用4枚AA電池，去旅行影到一半冇電都可即時到便利店購買。
可揭式3吋LCD芒方便以LiveView作不同角度影相和拍片。	Adv.內置「動態消除模式」、「多重動態拍攝模式」、「低光模式」3種特異功能。	除了拍攝1,080p影片，全新「超高速短片」功能可以1,000fps捕捉高速移動景物，如賽車、飛鳥等。
開啟「動態消除模式」後可調校0.5~20秒間隔連拍5張相片，然後清除移動中的物件。試拍半島酒店發現真係可以抹走馬路的車輛，只是行得太慢的路人抹唔走，唔係次次靈。