婷婷爆霆鋒唔准Lucas喊
謝婷婷與謝霆鋒因有個嚴母，兩人由細被打到怕，婷婷昨日出席活動時大爆哥哥同樣是嚴父一名，兒子Lucas才幾個月大已嚴加管教，向兒子喝罵「men don't cry!」，自細薰陶他男兒有淚不輕彈的道理。
謝婷婷昨日與汪詩詩和趙式芝出席A.D.M.J手袋活動，為「母親與女兒」作慈善籌款，即場分享與母親相處感受。
婷婷表示她與哥哥謝霆鋒是母親狄波拉的全部，所以拉姑管教甚嚴，她說：「細時同哥哥成日畀阿媽打，唔知點解哥哥成日畀佢打，我都幫佢頂過，試過佢被打到Pat Pat痛到坐唔到，媽咪嘅宗旨雖然好嚴格，但佢唔想畀人話我哋無家教。哥哥一畀媽咪打，我就即時做功課扮乖，無功課都要扮做緊，哈哈。」被問到有否試過反抗？她說：「試過同佢講數，媽咪要我跪，我駁佢係咪跪咗就唔打我，最後佢真係冇打我。」
謝賢拉姑乜都話好
受到母親嚴厲的管教，婷婷表示哥哥亦覺媽咪管得太嚴，但依家他卻變了嚴父，她說：「我以為佢做咗爹哋唔會嚴，點知佢仲嚴，雖然無見過佢打Lucas，但會喝佢，得六個幾月大時，佢同Lucas講『men don't cry』，係唔講道理嘅嚴，得幾個月大就咁講，栢芝見到都會心痛，之後平時都好少見Lucas喊。」反而拉姑與謝賢做爺爺嫲嫲後，只錫孫仔不會嚴管他，她說：「佢哋知道孫係用嚟錫，唔係負責教，對住Lucas樣樣都Yes。」
汪詩詩過冧爆生日
另外，剛過完生日的汪詩詩，表示老公甄子丹只得一日假期，所以她遷就老公飛北京慶祝，她說：「老公帶咗我去一間酒店餐廳，起初覺無乜特別，都係燭光晚餐，有好多花，點知之後佢着晒成套廚師裝，喺酒店親自下廚煮龍蝦畀我食，但因為只係包咗一半場，同場仲有其他客，佢影響真正廚師煮嘢，搞到個廚房亂晒，不過都好開心。」
文：名人組