Jocelyn為生B同老公講數
名模Jocelyn與老公Anthony為幫助貧窮小朋友，在慈善拍賣活動中出錢又出力，充滿愛心的兩人打算四年後生BB，到時Jocelyn更會放下工作做全職媽咪，不過他們仍未就生多少個BB傾掂數。
近年Jocelyn與老公Anthony積極參與慈善工作，前晚兩人齊齊為由三個團體包括九龍金域扶輪社、Hong Kong Auctions及Ivey舉辦的Charity Handbag Auction活動出錢又出力。大會共搜羅超過124個二手名牌手袋作慈善拍賣，賣得的款項將撥捐兩個慈善機構，分別是鮑廣桓兒童慈善基金和Moonlight Foundation Nepal（MFN）。
羅愛欣六百投靚袋
Jocelyn和老公Anthony都是MFN的中堅分子，所以當晚兩人親自上陣，義務客串擔任模特兒演繹多個手袋。每個手袋底價均由100元起，每次叫價為100元，現場反應熱烈，有份出席的羅愛欣便即場以六百元投得一個二手Miu Miu Clutch Bag。負責充當Model的Jocelyn示範之餘亦睇中了一個二手名牌手袋，她笑言：「我會不停舉手，志在必得，同埋都想老公投畀我。」
Rosemary撐場快閃
對於籌款幫助尼泊爾的貧窮小朋友，Jocelyn說：「孩子係大家嘅未來，希望幫助佢哋接受教育，遲啲會擴展到去香港嘅學校宣傳，讓更多人關注貧窮嘅小朋友。」問到如此喜歡小朋友，會否生BB？Jocelyn說：「我好鍾意依家嘅工作，仲後生，想過多啲二人世界，計劃四年後先會生BB，到時會做全職媽咪照顧BB。（會生幾多個？）三個。」但身旁的老公Anthony卻說兩個夠晒數，兩人就生多少個BB互不相讓，場面搞笑。
而一身露背裝來支持Jocelyn的Rosemary，只逗留了一會，在拍賣開始前便離開，她讚拍賣二手手袋概念不錯，還建議下次可考慮拍賣首飾。
文：名人組