山東驢仔肉驚喜小炒

驢仔腩位肉質幼嫩

「和味館」早年於新蒲崗結業後，不少忠實粉絲即時冇晒口福，好彩早前大廚文師傅回巢並於深水埗重開。重開的「和味館」菜式更多元化，除了一般小炒外，值得一試的有老闆推介的驢仔肉，貨源是來自內地，由供應商預先處理好原隻山東驢仔，再運來香港，文師傅會先斬件後紅燒，或者因應客人的口味，用咖喱汁來燴，辟走微微的驢羶味，驢肉有點像羊肉，但肉質更嫩。

另外這裏還可以吃到和味龍、竹蟲、蜂蛹、蠍子這些爬蟲卵蛹，不過就要提早預訂。文師傅特別推介和味龍，並謂煮和味龍前要先用滾水飛水，再用白滷水浸至入味，到有客人落單才炸脆上碟，咁至夠味兼夠脆。

沙白煮雞$120/半隻 用沙白、雜菇及薑酒來煮走地雞，啖湯清甜帶有蜆肉的海鮮味，雞肉煮後不算嫩滑，但有雞味。

炸和味龍$40/両（2両起） 先用滷水浸至入味才炸的和味龍，味道有點像有羊羶味的蝦膏。

堅持選用鮮雞入饌

老闆為了保持食物水準，堅持每天下午才去街市買鮮魚、肉蟹及大蜆等海鮮，同時只會選用來貨比較貴的內地走地雞，絕不用冰鮮貨，冇貨時情願不賣，全因內地走地雞的皮油適中又不會太肥膩，加上肉質嫩滑，可以用各式的烹調方法炮製。好像店子最出名的沙白煮雞，就挑選了4至5斤重的雞隻，加入沙白、雜菇及薑酒來煮，利用沙白這種蜆仔提升雞肉的鮮味，吃雞之餘，還可以連湯都飲埋。除了沙白雞外，布袋雞就是用豬肚包裹着填滿白胡椒的雞燉湯，以及用大孖一級頭抽燜製的頭抽雞，都是店內的招牌菜。

艇王炒蟹時價（約$300/隻） 用辣椒、豆豉及蒜蓉炒製的艇王醬香辣惹味，分量適中用來炒肉蟹啖啖肉。	乾煎羊扒$20/件 揀選蒙古吃草大的乳羊，取其肉質最幼嫩，吃時沾上師傅特製的羊肉粉，帶出羊鮮味。	豉椒龍躉腸$68 龍躉腸比鵝腸還要粗壯，用豉椒炒，惹味又夠爽脆。

和味龍知多啲

俗稱水曱甴的和味龍，外形像蟑螂，會飛會爬又會游水，正確學名是龍蝨，是水棲類卵圓形甲蟲，生活在靜水或流水中，每逢春夏交替即是清明時節前後最肥大。是中國傳統的藥用昆蟲，專治幼兒夜尿，由於含豐富鈣、鐵、鋅等營養，吸引不少人慕名品嘗。

撰文：褚愛琪

攝影：郭凱敏

查詢電話：2748 0002