藝人拍拖、結婚都係大眾關注嘅話題，有人選擇低調處理，亦有人唔介意公開談情。就好似莊思敏同吳浩康呢對小情侶咁，公開咗不但冇影響佢哋嘅感情，愈嚟愈sweet之餘，仲經常以情侶檔接job，有錢齊齊搵，可謂一舉兩得。
最近經常用手機上網、中咗「微博毒」嘅莊思敏，有次佢喺餐廳等男友，點知等咗好耐都未見人，加上間餐廳啲裝飾可能比較另類，掛滿晒啲恐怖面具，令莊思敏有不安感覺，於是佢喺微博度講咗句「好驚」，「在途中」的吳浩康睇到即刻留言呵番女友，莊思敏見到男友甜蜜留言當然食住上，撒嬌話要「食住等，入你數」，認真恩愛到爆！
