超雲搞濕男友唔再Dry
賭王何鴻燊千金何超雲與皮草太子爺王大業（Andy）拍拖時間雖短，但二人已打得火熱，形影不離。前晚超雲帶同Andy出席新一屆東華三院就職晚宴，不過首次陪女友出席大場面的Andy非常怕醜更坦承自己Dry，為了男友不再做Dry男，超雲公然表示要搞「濕」男友！
何鴻燊三太陳婉珍身為東華副主席，前晚與兩位千金超雲和超蓮一起出席晚宴，超雲更攜同男友王大業拍拖赴會。與男友甜蜜到場的何超雲戴了一條巨鑽頸鏈，不過Andy就躲在布景板，表現怕醜，超雲就坦承巨鑽來自媽咪，她說：「今晚帶埋男友支持媽咪。」（有冇叫男友掟一百幾十萬支持？）「你問佢啦，今次係第一次同佢嚟，係佢自己話嚟。不過佢怕醜，平時唔鍾意面對傳媒。（佢唔鍾意傳媒？）唔係，係怕。」
兩年後再問婚期
Andy說：「我嚟支持Auntie。（有冇帶錢嚟支持？）我嚟支持。（女友帶你嚟呢啲場合係咪肯定你身份？）我嚟支持。（超雲話你好Dry喎？）係呀，我成個人都Dry。」超雲聽罷解釋說：「我話佢個嘴Dry咋。」笑Andy有超雲竟還會Dry，在旁的超雲即說：「係啦，我會令佢由Dry變Wet。」
對於有報道將超雲和Andy家的物業來比較，Andy表示冇乜所謂，冇乜壓力，亦冇問題。至於何時跟超雲結婚，Andy指兩人才剛開始不久，要遲啲，過兩年再問他。問他想不想見賭王，他說：「冇乜期待，係時候就會見到，但係冇時間表。」
超蓮話阿媽靠害
三太則表示：「何生冇嚟係爭少少，錢一定有捐。啲女好樂意陪我嚟呢啲活動，佢哋拍拖都會抽時間陪我。（覺得超蓮男友Jeremy點？）幾好。（超蓮男友靚仔啲定超雲男友靚仔啲？）我老公最靚仔，除了我先生，其他人我都睇唔上眼。」三太又謂賭王當Jeremy是超蓮同學仔，她說：「佢（超蓮）身邊有好多同學仔『切卓』咁轉。」此時超蓮即輕輕打了媽咪一下說：「唔好亂講，靠害！」三太即說同學仔有男有女，叫超蓮不要心邪。而四月八日便是三太和賭王的結婚周年紀念日，三太透露到時賭王可能會到她家中吃飯慶祝。
文：名人組