林莉牛一冇仔陪失落
有「港版林志玲」之稱的林莉，前晚出席餐廳開幕活動，適逢是她牛一，雖然收了五位數字酬勞，但她竟然高呼冇男士約會慶祝生日，令她若有所失。
以招牌長腿示人的林莉，前晚與鍾蕙芝（Lavina）、胡心諾（Rainbow）與鍾浠文等出席某間以桌球做主題的餐廳開幕儀式，林莉說：「我係三月二十五日生日，喺生日前夕已經同咗媽咪慶祝，因為我哋都係同日生日，但我係新曆，佢係農曆。（咁你點慶祝？）同經理人及公司同事食飯，不過第二日要開早工，唔玩咁夜。（冇男士約咩？）冇呀！平時約親都係成班人嘅！（陪男仔打枱波？）我陪朋友多，陪男友就未試過，（怕喺波樓被人撩？）冇試過被人撩，出街都冇試過，都未試過被人博懵。其實我以前都學過英式桌球，打得唔叻，但就被人讚我腳長有天分，我一直都覺得男人打桌球好有型。」
Rainbow寫真行grand
低胸性感示人的Lavina，則被密實look上陣的Rainbow暗寸，Rainbow說：「我着衫要睇心情，天氣轉凍啦，而且就快會考，遲啲我又要同幾個師妹去影寫真，我唔想病，所以密實啲。今次本寫真我畀好多意見，例如建議着咩內衣，性感程度會比寫真月曆少啲啲，因為我想轉行grand路線。」
Lavina上波樓冇人撩
Lavina則表示：「我都有着褸嚟嘅，我着衫都睇場合。我讀書嗰時都有同男同學去篤波，不過我好渣，成日被人笑，我知好多女仔去波樓打波，都有好多男仔圍住睇走光，所以我一定做足安全措施，而且我次次同成班人去，所以未試過被人撩。遲啲我都要影寫真，亦係走grand路線，好似之前寫真月曆嗰啲性感相，依家畀我再揀，我都唔敢影。」
文：影視組