《三國無双》玩到悶、《高達無双》坊間反應好壞參半，Koei呢鋪真係要靠《北斗無双》打救。由《北斗之拳》改編嘅「一騎當千」遊戲，用拳四郎、雷奧、由莉亞等主角同嘍囉混戰使出「北斗百裂拳」等傳承奧義同最強嘅「無双鬥舞」，點都合理過叫高達一揪百。但係最唔合理係定價貴，炒價更貴，六百蚊玩隻Game，抵唔抵自己諗！
《北斗之拳》漫畫由1983年開始連載，早喺紅白機時代已經遊戲化，但講到最夾係今次撞上《無双》系列，可以重現漫畫精髓。忠心Fans應該會跟住遊戲嘅「傳說篇」嚟玩，拳四郎上身周圍打，最後同雷奧對決；至於遊戲另一模式「幻鬥篇」就係原創故事，可以任用拳四郎、雷奧、尼爾等幾位主角上場外，亦玩埋其餘大茄如積奇等嘅支線劇情，好似積奇冒認拳四郎去唔同城鎮搶掠，體驗原作都冇嘅感受。
以往《三國無双》只係拳打腳踢，敵人死咗就只係瞓低；《北斗無双》就可以捉起敵人嚟狂毆再掟走，甚至打到爆頭、噴血、爆肚兼斷肢，血腥成分重咗好多。要出「傳承奧義」，當然要喺戰場上加技能值先可以慢慢學到，抵讚係今次升級系統好有彈性，畀玩家自己揀點樣升級；打大佬嗰陣，絕招「無双鬥舞」使出方法同好多動作遊戲一樣，睇畫面指示準確輸入指令，成功就可使出華麗嘅連續攻擊。既有原作精髓，又吸納咗新玩法，呢鋪應該可以省番靚《無双》個招牌。
類型：動作
開發：Koei
平台：Xbox 360、PS3
推出日期：已推出
售價：約$600（Xbox 360行版建議零售價：$549）
查詢電話：2725 3338
撰文：布偉倫