鐵甲大膠 激射飛拳

撰文：鍾鎮科 攝影：胡淑儀、黎劍華 查詢電話：2433 1828

60cm高仿合金塗層

向來Jumbo神級玩具都係用來做擺設，多過玩關節擺甫士，所以拆盒前對大膠的可動性不寄厚望，但玩上手卻發現今次隻60cm巨型鐵甲萬能俠，外觀竟有九成似合金魂，原來它採用今年上映的《真鐵甲萬能俠 衝擊！Z篇》動畫造型，更特別在硬膠表面加上金屬塗層，令黑色機身富有光澤，銀色部件擁有質感，遠睇絕唔似一舊膠，為這隻「超合金始祖」增添時代感。

換上另一隻前臂和彈弓後，便可按機關發射「鐵甲飛拳」，估唔到大膠都咁仔細。	加上仿合金塗層後，遠睇真係以為是巨型超合金模型，連對眼都換上透明黃部件，正！	頭頂的朋友號可以分體打開機翼，造工確是一流，但點解機艙唔見左兜甲兒（港譯杜劍龍）?

上半身可動好玩

不過最驚喜要算是這隻大膠，除了可以雙手舉起放出「高熱火焰」必殺技外，仲附有手部配件更換，發射另一絕招「鐵甲飛拳」，而且頭部亦忠於原著可摺埋朋友號飛船玩合體。膠公仔都咁多嘢玩，你話抵唔抵讚？可惜靈活性只限於上半身，60cm鐵甲萬能俠腳部沒甚麼關節可言，只能夠企定定擺甫士，如果改埋仲企得穩，咁就稱得上完美大膠啦！

將合金Big Foot Player彈丸號同個籃球拍埋，就知佢Size同隻手掌差唔多大。

備有多款手掌球鞋配件，畀機械人擺打波甫士，動作當然比大膠靈活。

同場加映：Big Foot Player合金打籃球

除了這隻做到合金一樣的鐵甲大膠，Bandai同期另有一隻真正合金Big Foot Player彈丸號，官方話曾經出過動畫，老實說小記全無印象。第一眼望埋去時還以為自己玩緊變形金剛，但對於機設和構想卻十分有興趣，由汽車機械人去打籃球，可以換上不同手掌和球鞋配件，仲有個迷你籃球畀你擺甫士，走籃、入樽、跳投等動作都冇難度。