Juno × Tough 全副武裝

早已聽聞Juno麥浚龍有個襯衫「怪論」，就是由頭到腳由底到面都要同一牌子。今次首度跟Juno碰面，得他親口證實這獨特時裝配搭方法，並身體力行Full Gear「全副武裝」，將Tough的春夏新Tee新褲新錶盡披上身，可惜品牌暫未推出內衣褲……

軍綠色短袖有帽外套 $795、灰色圖案Tee $475、洗水牛仔褲 $1,050

着出品牌精神

大家對Juno的印象都是黑白灰調為主，但就愛戴上浮誇閃令令的配飾，不過據Juno所講，他的裝扮視乎個別品牌而定，因為他鍾意Full Gear上陣，全身都是同一個品牌，可以的話就連內衣褲都襯埋。「我有推出過自己的品牌，知道每個品牌的設計背後都有其理念同風格，所以我盡量都會着番同一個品牌，着出品牌精神，最好連內衣褲都着埋。我之前同Wyman傾開都話咁樣好出事！不過我會將每個品牌的新衫舊衫互相Mix & Match，不一定要每季都買齊全套襯到十足十。」今季Juno首次同本地品牌Tough合作同樣都是「Full Gear」，除全身換上品牌服飾外，全套做足親自參與廣告創作，以「白色恐怖」方法，全白「爆光」加血流披面的方式去營造陰沉氣氛。講到品牌服飾，他特別欣賞其風褸同外套設計。「我之前在廣告中示範好多Tee款，今日拍照首次着上覺得非常不錯。新系列亦有好多鮮色Print Tee，我就會用深色風褸襯鮮色Tee，平衡一下。」

衝破黑暗

向來走軍事同黑暗風格的Tough今季一改風格，以Beyond The Dark為主題，在其原有的軍事、音樂、運動服同工作服元素加入創意細節，一系列的搶眼圖案Tee就是最佳例子。近年功能服同運動服大熱，品牌亦推出不少功能性風褸同運動外套，土色鮮色系列都有齊。至於著名的牛仔褲繼續走Vintage路線，在擦白、磨破同褪色牛仔褲上，加入鐵銹色、金屬扣同撞釘細節。