自從電影《阿凡達》後，3D備受追捧，就連以武俠神話為題材的Online Game都話要加入3D元素。《龍Online》的立體靚絕畫面成為近期Game迷的熱門話題，不過令他們期待的，卻是遊戲奇招盡出，給予玩家好大的自由度，跟以往的Online Game有明顯分別，充滿新鮮和刺激感。
撰文：陳若冰
《龍Online》請來人氣性感模特兒周秀娜（Chrissie）擔任代言人，Cosplay拍攝宣傳照之餘，Chrissie更破天荒開咪獻唱遊戲主題曲《龍鱗》、拍埋MV！Chrissie形容做遊戲代言人、Cosplay和唱主題曲都係佢嘅「第一次」。遊戲的港澳版代理商Gameone表示，《龍Online》中有四大巨龍——翼龍、神龍、電龍、暴龍，分別代表自由、正義、力量、兇惡，而周秀娜就有齊上述四種特徵，真係「捨她其誰」咁話。
遊戲自由度非常之高，玩家除可揀性別、髮型、臉形及服裝等外，仲有一個「天資系統」。此外，玩家不受職業和門派限制，想學咩武功，全視乎玩家加點去邊種天資。天資分為「戰鬥」和「輔助」兩種，前者係攻擊技能，細分為內功和外功天資。外功包括劍術、刀法、長兵、弓法；內功則有陽剛、陰柔、醫毒、音律各4種，玩家可同時修內功和外功，也可揀雙內或雙外，所以日後如果你發現一個刀客識得補血，都唔使大驚小怪。
《龍Online》食住潮流大玩3D視覺效果，遊戲畫面盡顯山明水秀、風光如畫，玩家除咗可以爬上山頂一覽明媚景致，仲可以大玩輕功飛簷走壁。之前提到的輔助天資，其實類似雜耍技藝，如輕功水上飄就是其一，有趣到極。
在《龍Online》中，寵物被稱為「靈獸」，分為輔助類和坐騎類，輔助類可幫主人拾取、生產和治療，坐騎類則可加快移動的速度。不過就算有坐騎類靈獸都唔係話騎就騎，去商城買本《騎術技能書》學「御靈之術」先啦！
遊戲類型：MMORPG
開發/代理：大承網絡/Gameone
推出日期：2010年3月18日
官方網站：loong.gameone.com
遊戲故事參考中國《山海經》內的神話軼事，並將古時神話中的人物轉化為女媧、神農、伏羲、軒轅、三苗、九黎、月氏、共工八大氏族，爭奪散落在不同城池的九粒擁有強大神力的龍珠。
Gameone將於4月在深水埗西九龍中心舉辦春季嘉年華活動，屆時玩家除可參與精彩的遊戲和欣賞表演，更有機會親自從周秀娜手上獲取咕𠱸，Chrissie迷勿失良機。
日期：4月10~11日
地點：西九龍中心