3D導航M10 四圍搵食

撰文︰陳志滔 攝影︰郭凱敏

行至比較複雜嘅路口時，地圖右方會切換成3D，跟住行就唔怕走錯路。	提供60萬個附加資訊，餐廳、油站、戲院、購物熱點、銀行等，應有盡有。	手機會把附近餐廳分類，中、泰、美、意、日任擇。

查詢電話︰3582 4738

手機另一賣點是Click & Go功能，唔理係網頁、SMS還是電郵，只要點一點內裏文字，就會自動導航或到維基百科查找資料。	機背全白，令銀色嘅相機模組分外搶眼，可惜500萬像素鏡頭連自動對焦都冇，影相一般！提供3.5mm介面，毋須轉插就可用回大路耳筒。	電阻式屏幕反應麻麻，好彩跟機有支Stylus幫助篤芒。

首用WM 6.5.3

Garmin-Asus於手機界仍算初哥，不過新機M10上手感覺卻唔差，拋光白色塑料外殼，側邊有銀色鍍鉻裝飾，望落有幾分無印簡約Feel。機身大小適中，3.5吋屏幕有400×800解像度，睇片睇相都好清晰，只可惜屏幕為電阻式，篤落唔算靈敏，好彩跟機有支Stylus幫手。系統方面，佢係全港首部WM 6.5.3手機，比WM 6.5有若干升級，好似圖示大咗、IE存取網頁快20%等；廠商還自行開發了3D工作管理員，一按就可隨意關閉個別程式，為WM系統提升效率。

要拆電先換到記憶卡，唔夠方便，但係電池容量竟然達1,500mAH，夠備用25天，勁長氣！	機身薄過兩毫子直徑，女仔用都唔太累贅。	放大圖片

3D地圖唔怕迷路

既然Garmin有份研發，好多人都睇重佢個GPS定位，實測所見功能媲美專業PND導航機，不但預載晒香港、澳門及廣東地圖，慳番筆數據費用，初次定位仲只需35秒左右，比一般GPS手機快4倍有多。導航佢亦好耍家，中、英雙語提示唔算出奇，最正係行至複雜路口時，軟件會自動進入3D地圖模式，這時畫面會變成第一身視點，顯示同實景有8成相似嘅3D路口同建築物，而且有來電也不會中斷導航，咁細心想行錯路都難！

OpenRice方便搵食

除咗地圖，導航軟件還提供60萬個附加資訊，例如銀行、觀光點甚至油站等，每項都有詳細電話同地址，簡直係一條龍服務！而針對一眾饕餮，內置了OpenRice應用程式，跟網頁版一樣睇到餐廳資料及食評，揀啱就可立刻導航，搵食話咁易！其他特色功能還包括Movie Times同交通工具搜尋，前者幫你查看上映電影資料，後者只需輸入起點終點，就即時幫你搵出最快乘車路線，至啱夜蒲一族搵路返屋企！

規格表

制 式︰GSM四頻、UMTS 2100

系 統︰WM 6.5.3 Professional

屏 幕︰3.5吋6.5萬色TFT、400×800解像度

鏡 頭︰500萬像素全景對焦

記憶體︰內置4GB，支援microSDHC記憶卡（最高32GB）

對外連接︰藍芽2.0、USB 2.0、7.2Mbps HSDPA、384Kbps HSUPA、Wi-Fi

通話時間︰8小時（2G）、4小時（3G）

備用時間︰600小時（2G）、300小時（3G）

體 積︰116×58×14.3mm

重 量︰138g