最薄防水機春天濕住影

在Cyber-shot TX5之前，Sony有幾多年冇出過防水數碼相機？原來上一部已經係03年的U60。而7年之後的TX5，特別之處在於第一眼睇到未必估到佢係四防機種，原因機身設計同一般TX系機冇分別，而且17.7mm厚度更薄盡防水機界。下次落水影相，記得帶部又薄又索的TX5一齊去！

3米水深照玩

市場上多數防水數碼相機都肥大肉厚，今次TX5就改變大家對防水機的印象。用上黑、綠、粉紅、紅及銀色5色機殼設計，外觀以至尺寸同剛推出的全高清影片攝錄相機TX7差唔多，而且TX5機身厚度僅有17.7mm，帶去游水唔論盡。TX5的防水功能做到足，可以在3米水深玩到一個鐘；而且揀選「水底拍攝」場景模式時，TX5更會提示大家關好電池蓋，好體貼。

售價：$2,990

TX5對應MS及SD卡，另電池蓋亦加入防滲水膠邊。

TX5機身厚度僅有17.7mm，當今最薄。

四防設計防撞1.5米

TX5唔止防水，更具備防塵、防撞兼防禦嚴寒的全天候功能。TX5可以抵受到由1.5米高跌落地的衝擊力，亦能夠在-10度的嚴寒環境下使用，即係話入水能玩外，出水亦可行山遠足，甚至滑雪都用得。對於其他全天候機種，TX5加入的新功能亦更好玩，配備輕觸式屏幕，可以在畫面上簡單執相同畫公仔，夠Fun！

防水橡膠套跟機身同樣有5色選擇。售價：$100

採用輕觸式屏幕，可以直接在畫面上為數碼影像後期加工。

內置智能一掃全景功能、高動態範圍背光修正模式及手持夜景拍攝等特別模式。

大背光冇有怕

TX5採用1,000萬像素Exmor R CMOS感光元件，以及一支25~100mm的4倍變焦蔡司鏡頭，成像力以及雜訊控制都唔錯。在高反差及背光環境下，唔開閃燈補光好容易令主體過暗，靚女都變黑面神，TX5便加入高動態範圍背光修正模式，可以連拍兩張曝光值不同的數碼影像再合併，背景光，主體亦夠光。Sony亦特別為TX5設計出一系列新配件，好似同樣有5色設計的型仔防水橡膠套，亦有浮水相機帶，可以將相機箍實在手臂，價錢都只係一百幾十，抵玩！