《BJ單身日記》英國男星哥連卓夫近期憑《單身男人》同志角色，除贏得威尼斯影帝外，火速上位更獲提名奧斯卡最佳男主角，他最近接受訪問時，大談與首次執導的時裝設計師Tom Ford的感受，並自爆人氣急升未有令他獲大製作電影青睞。
記：記者 哥：哥連卓夫
記：你今次憑《單身男人》首次提名奧斯卡最佳男主角及在不少頒獎禮封為影帝，感覺如何？
哥：其實我後生時覺得奧斯卡係唔健康，對專業有不良影響。因為我覺得演戲唔係運動，唔應該將演員作比賽，而要多點合作。依家就冇以前咁執着，我變成一個妥協嘅中年男人。而喺威尼斯電影節封帝實在係我記憶中其中一個最美好嘅時刻，而且我對意大利有情意結，我太太係意國人，我都識講意大利話。
記：依家係咪已經收到好多大製作電影搵你演出？
哥：唔係，我冇收到好多片約，因為有啲係唔能夠接受，所以我唔係每日都喺度拒絕啲幾千萬未開頭嘅支票，哈哈。我接戲會睇好多因素，有時係因為想同對方合作，有時就想輕鬆拍套片。
記：戲中你有幾幕全裸同游裸泳，時裝設計師兼導演Tom Ford有冇逼你減磅，令你以最健美身形演出？
哥：Tom冇逼我，佢係用氹我嘅方式同我講：「你本身好好，但如果身形弗啲會仲好，我出錢同你搵個教練。」我都覺得效果好好，嘗試繼續做運動保持狀態。
記：Tom Ford係首次做導演，你覺得佢表現如何，合作愉快嗎？
哥：今次拍戲好開心，因為劇本冇乜對白同情節，我同Tom一齊去創造佐治呢個角色。呢個係講信任，大家講出唔同嘅睇法。我覺得佢某程度上都幾容易溝通。佢會將一切喺控制之中，但同時又畀我好大自由度發揮。令我能夠完全掌握個角色實在係個福分。
記：你要演一個失去多年配偶嘅同志教授，演同志角色對你有冇難度？
哥：我首次演戲就係演同志，亦因而開始我嘅事業。我喺《媽媽咪呀！》及另一套戲亦有演過同志。如果角色有趣同吸引，我樂意演任何角色，唔會因為性取向而決定演出。我覺得演出上唔係咁大分別，愛就是愛。
記：戲中嘅大宅設計同角色嘅服裝都非常有風格及華麗，係咪出身於時裝界Tom Ford嘅特色？
哥：好多人錯覺一個時裝設計師轉做導演可能只是晒其時裝觸覺，但呢部戲係講述一個中年男人失去伴侶嘅傷痛，點睇都唔會似有機會騷其春裝系列吧！電影服裝同大屋都好靚，但亦反映主角嘅心境。你一入茱莉安摩亞角色嘅屋內，便感覺對她有啲認識。電影冇太多對白，便於場景中表達出來。
在《單身男人》中與哥連卓夫合作的茱莉安摩亞，戲中與身為同志的哥連角色曾有情侶關係，後來哥連變攣後便成老朋友，關係微妙。茱莉安亦指最初被這個關係吸引而一口答應演出，她更對老友Tom Ford有高度評價：「佢一直係我時裝界的好友，我知佢想執導但一直冇跟我提起。後來佢電郵邀我演出，我好有興趣便答應佢。佢執導時好細心，好有準備，看得出他好享受及做得出色。」
文：外娛組