鼓女李蘊教Sing呢

鼓勵師弟妹

每年3~5月，都是各大專院校及中學搞歌唱比賽的旺季，冠軍級人馬更會齊集5月的聯校歌唱比賽決賽。而Renee也是03年參加歌唱比賽「新星新人類」，而被經理人發掘簽約成為旗下歌手。雖然今年Renee已入行6年，也正式脫離組合Cream名義作獨立發展，但提到當年比賽依然回味︰「唱現場真係好大壓力，但就可以訓練膽量同勇氣，香港教育成日叫人死讀書，其實參加一次歌唱比賽，人生閱歷比書本學到更多。」早前母校舉辦的歌唱比賽，她也有回去做表演嘉賓，身體力行替師弟妹打氣。

師承亞洲鼓王

唔好睇Renee弱質纖纖，原來已經有6年打鼓經驗，仲成日同班同學圍埋講鼓經添！Renee︰「自細已經好鍾意打鼓，覺得女仔打鼓好型。依家一星期都會練一至兩晚，有時又會同朋友夾Band，希望第時可以組隊女子Band啦！」Renee師承亞洲鼓王唐龍，所以技術一啲都唔差，仲做過張震嶽演唱會的客席鼓手，果然有料到！

台風最緊要

捱了多年，Renee於去年推出首張個人名義大碟，並打上IFPI大碟榜十大之位，因此向各校參賽者教路，佢絕對有資格︰「唱歌台風好重要，尤其係眼神同手勢。有啲人喺演唱時，眼神不時向旁邊或上面飄，會令評審或聽眾目光都順勢轉移過去。其實只要眼望前方，再順住旋律擺動手勢，就令人感覺有自信！」Renee補充，比賽時要控制好情緒，不能太High也不能太Cool，例如唱慢歌時感情太澎湃，就會跟曲風格格不入。

愛才華型男

入行咁耐，Renee大部分時間都身兼兩職，現在白天修讀商科課程，其餘時間則忙於排舞、出碟及拍寫真，由於仍身處校園，問佢依家學生妹追咩星就最適合︰「我啲同學近年都係追台星多，好似飛輪海、棒棒堂咁。我自己就好鍾意五月天同張震嶽，外國就Lady GaGa，覺得佢哋自己作曲作詞好有型。我都想做多啲創作，好似填詞咁表達自己心聲，又或者反映時下社會問題。」估唔到Renee早入行連喜好都早熟過人！

想睇《爆粗BAND友》

除了唱歌打鼓，小妮子跟其他少女沒有分別，都喜歡上網MSN同Facebook，但原來最大興趣係食嘢︰「我好為食，咩嘢都食，甚至早餐都要食飯，如果人哋叫我打邊爐，我實仆倒去！」但提到校園大熱漫畫《爆粗BAND友》佢就話未睇過︰「其實我一路都想睇，只係冇時間，但我知入面有個鼓手Camus火燭都照打鼓，好鬼有型呀！」

全港中學校際歌唱大賽

歌唱比賽是發掘演藝界明日新星的搖籃，當中又以香港專業進修學校舉辦的全港中學校際歌唱大賽最具代表性。自2006年舉辦至今，已有超過1,000名同學參與此項校際比賽。去屆比賽更創出新紀錄，共有135間中學、逾330名中學生報名參賽。今年總決賽將於3月21日晚上舉行。

網址：www.hkct.edu.hk/singing/2010/home/index.html

女大十八變

快將19歲的Renee於04年13歲時，與年紀相若的陳曉彤（Hilda）及盧嘉寶（Carpo）組成三人o靚妹組合Cream，展開其銀色旅途。當年Renee年紀小，只是小童一名，但女大十八變，如今已經變成亭亭玉立的美少女。

天生明星

BB時已經對鏡頭甚敏感，注定食娛樂圈這行飯。

初擺甫士

5歲後開始識擺Pose，影學生相都要加港女V字手勢。

初踏台階

雖然組成了Cream，但Renee上台仍然一臉孩子氣。

少女味濃

16歲時打扮樸素，不過天生美人胚子就十分上鏡。

李蘊小檔案

英文名：Lee Wan，Renee

生日：1991年7月27日

星座：獅子座

身高：167cm

體重：45kg

喜歡吃：雪糕、蟹、辣

嗜好︰唱歌、打鼓

演出：電視劇《盛裝舞步愛作戰》、電影《第一誡》

母校︰慕光英文書院

撰文：陳志滔

攝影：梁偉德