雙芒Mirror PL150頭黐頭即拍

唔知點解，無論乜嘢年代，感情要好的女性朋友都鍾意好似孖公仔咁行街、買衫，甚至去廁所都要黐住。就好似o靚模Leanne和Hailey，自拍都鍾意面貼面，好在Samsung Mirror PL150卡片DC具備前置芒，仲加入「Twin Shot」自拍模式，當兩人黐埋一齊就識自己影。

雙芒自拍好輕鬆

Samsung去年推出雙芒卡片相機ST 500/550，備受一眾愛自拍的用家歡迎，新型號PL150規格與上一代接近，但售價貼近二千元不升反跌，同時還增加了新功能，相較之下更加抵玩。Mirror PL150延續雙屏幕設計，除機背的3吋LCD，更有一個1.5吋前置顯示屏，自拍可以當鏡用，角度靚一靚先影。新機更加入了「Twin Shot」功能，玩雙人自拍時，當兩人的頭貼近，相機便會自動拍攝，再啟動埋「Smile Shot」，就快門都唔使撳，自動影張靚靚自拍合照，簡直係為情侶及孖公仔而設。

配備1.5吋前置式LCD，輕輕敲兩下便能開啟。

機側隱藏了USB及HDMI介面，用於接駁電腦及電視。

改用細小的microSD作為儲存媒體，符合潮流。

Jump Shot啱跳跳紮陳偉霆

相機另一項獨特新功能是，在拍攝主體做出連環跳躍動作時，可自動快拍三張照片的「Jump Shot」功能。在發布會上又跳又唱的陳偉霆話這功能很適合用來拍攝他在台上的演出，包保冇影漏。除此之外還少不了Smart Auto智能場景、美顏、眨眼偵測、人臉記憶模式及Smart Album等。Mirror PL150本身規格也夠實力，1,240萬拍攝像素、5倍光學變焦、27mm廣角鏡頭、720p高清攝錄、OIS及DIS雙重防震技術，應有盡有。