近年簽了不少模特兒及引薦日本模特兒來港行騷的「日本通」王友良（Ivan），偕同兩位新模「翻版傅穎」鄭詠詩（Wing）及「嫩版林志玲」葉芷婷（Ariel）在《美麗華潮花市》跟大家拜年。

Ivan虎年願望是事業順利，希望可介紹多些香港藝人赴日發展，「雖然好忙，但我都會抽時間搞新碟，已經錄緊歌。我依家單身冇拖拍，希望快啲搵到個女朋友，擇偶最緊要係孝順父母，錫屋企人，我好有家庭觀念，（遇到啱即刻結婚？）哈！都唔排除架，我好喜歡小朋友，好想快啲成家生仔。」

另外，本來同中巴鄺敏慧同公司的Ariel，轉投王友良旗下，希望模界發展更上一層樓，「行性感就唔會，我個樣啱行可愛路線，（似林志玲？）我都想好似佢咁成功咁高貴，佢係我學習對象。」至於Wing則說其41吋長腿是撒手鐧，並笑言雙腿易撞瘀，故要小心保護。