四個本不相識的角色——建築師、私家偵探、FBI調查員同女記者走埋一齊，會發生出甚麼故事？難道係四角關係？非也，他們因為PS3獨佔冒險遊戲「Heavy Rain」中的一連串兇案走在一起，玩家要分飾四角以身犯險，抽絲剝繭查出兇案真相。遊戲取材完全是成人向，暴力、色情甚至死亡都會在遊戲中出現，玩落似睇緊荷里活懸疑片。

分鏡似電影

「Heavy Rain」故事以神秘的連環綁架殺人犯為主軸，在4日限期內玩家將輪流扮演四個角色冒險，遊戲中每個決定都會影響到劇情發展，就算有角色在過程中死亡，都可以由其他角色接棒繼續。

人物角色造型相當立體，大頭時鬚根亦睇得一清二楚，甚至同人打交後面容會出現唔同程度的傷害，真實感十足；另外，遊戲的「拍攝手法」好有荷里活水準，分鏡系統極富電影感，因情節推進用上分割畫面呈現不同角色的視點，加上步步進迫的情節，愈玩愈投入！

成人向故事

角色冒險時既要按現場環境揀選合適對答以獲得線索，亦要使用六軸PS3手掣做出開車門、在身上搜物件等動作，而打架時就要根據畫面顯示的按鍵輸入指令，好似初玩無耐私家偵探就要肉搏嫖客。暴力之外，離不開色情，這任務就由女記者Madison負責，據講有幕要不斷搖手掣幫佢除衫。要玩幾耐先至揭開兇案之謎？官方資料話最快4小時，最長約12小時，不過既然唔同處理手法會衍生出唔同結果，即係話遊戲可以煲完再煲，有排玩。

遊戲資料

類型：驚慄冒險

開發：Quantic Dream

平台：PS3

推出日期：已推出

售價：$358

查詢電話：2341 2356

撰文、部分攝影：布偉倫