我中咗六合彩呀！

自己從來都不是會買六合彩的人，日前是人生第一次買六合彩，我仲要唔係專登去買，因為嗰日唔知咩三千幾萬金多寶定唔知咩啦？朋友話要買，咁咪陪個朋友去投注站囉，唔好怪我孤陋寡聞……嘩！原來投注站係咁㗎！對唔住！

咁我見朋友就咁行埋去排隊買廿蚊電腦飛，自己好奇貪過癮咪排埋一份買嚟玩吓囉，朋友話：都係用廿蚊買個機會！咁好啦……就當食少個楊枝金露，買個機會啦！行到埋櫃台：廿蚊電腦飛呀，唔該！就係咁……我就奉獻咗我嘅第一次畀馬會！

由細到大，睇六合彩攪珠，令人最深刻的應該是主持人冬叔夏春秋同埋六合彩嘅音樂，不過從來都無諗過要買六合彩，唔知點解？唔買就係唔買，無得解！

我是一個比較踏實的人，不勞而獲嘅嘢，太唔真實喇！無端端你唔使做，有人畀咁大舊錢你，你唔驚呀？我驚呀……所以我會將今次中六合彩的錢捐晒佢！因為我已經賺咗個意頭攞咗個彩！最後都係呢句喇：小賭可以怡情，大賭可以亂性！唔好沉迷賭博！

時裝設計師