新年最愛到維港欣賞煙花匯演，有人話現場聽到「嘭嘭聲」虎年實發到「嘭嘭聲」，不過對小記來說，逗完利是有得同家人影美麗綻放的煙花，細味動人時刻才是重點所在，見近期DC機仔都有夜拍、特效等功能，加些小技巧就能捕捉靚人美景，一於帶齊裝備迎接煙火晚會來臨。

低ISO曝光唔怕起粒粒

要在漆黑夜空拍出耀眼煙花，曝光時間慣常要4秒以上，但長時間曝光又怕多雜訊和手震，令人感到頭痛，好彩新DC已支援夜拍抗噪功能，只要將ISO調至100（或以下），基本上已冇晒粒粒。就算DC仔沒有手動或光圈快門先決，將場景調至夜景或煙火模式一樣掂，以下就去到影友至愛的煙花勝地，加些小腳架、魚眼等配件玩出特殊效果。

尖東勝地 影煙花要有腳

尖東出名多靚位捕煙花，就算入唔到文化中心，廣東道和彌敦道一帶都能Set好腳架捕捉，巿面不少摺合式輕巧腳架適合1kg以下DC使用，當開啟慢快門拍攝時，煙花便由一點點星光化作美麗綻放的線條，是夜景最佳配搭。

推介相機：黑夜之王 Canon PowerShot S90

功能賣點：配備快速控制環的Canon S90除了擁有F2.0大光圈，還可手動曝光至15秒，在昏暗環境下都能影到靚相。

攝影配件：輕巧腳架、黑卡（可用黑色物品代替）

拍攝方法：落腳架固定DC作長時間曝光，當遇到第一幕與第二幕煙花間場（等待煙吹走時），可用黑卡遮住鏡頭，待第二幕開始才拎走黑卡繼續曝光，這樣畫面便能更加豐富。

售價：$3,680（a）	將ISO調至100（或以下）減低訊噪影響，有腳架的話將光圈收細輔以慢快門拍攝。	維港放煙花例必封路，大可利用JOBY扭扭腳架繞實鐵馬或借助欄杆，咁就隨時搵到位曝光影靚相。售價：$180起（e）

IFC顯特色 廣角魚眼搶鏡

煙花由幾艘躉船同時發放，有時望得天空又睇唔切船隻發放的花海，倒不如到山頂和IFC等地離遠拍攝，玩廣角鏡盡覽維港燦爛景色，甚至可加入魚眼鏡將煙花和建築物扭曲變形，Wide鏡搭腳架令IFC變成一條蕉都咪話唔過癮。

推介相機：潮Snap自拍 Ricoh GR Digital Ⅲ

功能賣點：GRD Ⅲ屬潮人至愛的Snapshot機仔，配備28mm廣角F1.9特大光圈及手動曝光功能，還可加Mount駁鏡要幾Wide有幾Wide。

攝影配件：Ricoh 21mm廣角鏡連Mount、Jackar Mini Fisheye鏡頭

拍攝方法：搵個靚位固定機身後套上Wide Angle或魚眼鏡，盡可能連建築物拍攝，凸顯鏡頭變形的誇張感。

21mm廣角鏡售價：$1,500 遮光罩及轉接器售價：$800（b） 相機售價：$5,000（b）	DC機仔不能像DSLR般換鏡頭，想玩魚眼Wide Angle的話，大可加一個Jackar Mini配件，可配上魚眼或廣角鏡。售價：$780起（e）	魚眼試相：雖然Fisheye是雜廠出品畫質只屬一般，但令到IFC等建築物變彎，配埋煙花肯定夠特別。

包船出海 橫掃海旁全景

唔想同人逼可能會約齊二、三十人包船出海開Party睇煙花，但由於在海中心搖來搖去，落腳架都冇乜幫助，建議帶部備有手持夜拍或全景功能的DC仔，橫掃維港兩岸全景。拍攝時注意水平移動，避免海岸線傾斜就搞掂。

推介相機：一掃全景 Sony Cyber-Shot DSC-TX7

功能賣點：篤芒操控的Sony TX7，雖然沒有手動曝光功能，但加入智靚情景iSCN及一掃全景Panorama模式，影煙花夠特色。

拍攝方法：在拍攝模式啟動「iSweep Panorama」後可選擇左、右、上、下4個方向拍全景，按實快門水平一掃就見晒兩岸景色。

售價：$3,290（c）	Sony新機獨有一掃全景功能，只要篤芒選擇「iSweep Panorama」便可按實快門合成全景相。	全景試相：手持拍夜景時唔需要腳架等配件便可拍攝超廣闊靚相，解像度達4,912×1,080兼且清晰自然，值得一讚。

照耀金紫荊 閃出靚人美景

除了拍攝維港兩岸風景，不少人都會趁住夜空綻放煙花，與心愛的人拍攝留念。如DC仔設有夜景人像模式，便會利用慢快門後閃（Rear sync），曝光幾秒後閃一下Flash；如沒有場景模式的話，則可以加燈仔手動Flash一樣掂。

推介相機：G-Shock三防 Casio EXILIM EX-G1

功能賣點：身為三防DC新貴的Casio G1，就算影煙花時遇着毛毛細雨，甚至唔小心跌落地都可照常拍攝，內置煙火及間隔攝影模式。

攝影配件：Sunpak PF20XD燈仔

拍攝方法：想在煙花背景下影出亮麗人像，可為DC加一支迷你燈仔，設定長時間曝光拍攝中途，手動Flash一下閃燈（調至合適輸出），人物便會更Sharp。

閃燈售價：$480（e） 相機售價：$2,780（d）	Casio相機特設BestShot場景，內有煙火模式降低快門速度，但建議附以腳架減低手震情況。	Sunpak PF20XD可配以任何DC作Slave輸出，還可調校閃燈強弱和按TEST掣手動Flash，足夠為DC仔補光。

免費免裝！Web出特效
自動製作全景相

如果部DC冇全景功能又想拍晒維港美景，大可試用MagToo網上自製全景相，只需在拍攝時先將維港分成幾份，水平移動DC逐格影。返到屋企便可Upload上網，點取「Panorama Show」將相片結合成一張靚相，過程只需兩個步驟。首先點「Add Your Photos」上載所有全景相片，系統便會自動偵測排列，再按「Stitch Photos」等一陣就有相睇！

網址：http://www.magtoo.com

移軸效果玩景深

嫌太多人逼唔到去海旁睇煙花，不如試試離遠影一些煙花連建築物的相片，然後玩「移軸」（Tiltshift）特效，凸顯淺景深感覺。方法亦很簡單，進入Tiltshiftmarker網站上載一張相片，然後調校「Focus Size」（朦朧的位置、大小和強度），便可預覽效果並製作保存，幾分鐘就搞掂，完全不用安裝任何軟件，新仔都可變成玩相高手。

網址：http://tiltshiftmaker.com/

查詢電話：（a）3191 2333、（b）2292 5111、（c）2345 2966、（d）2926 2300、（e）2185 7791

撰文：鍾鎮科

攝影：盧展程

模特兒：June、Cherry、Rita（Kaleidoscope）