報道話「影像飛晒出嚟」、「個波好似兜口兜面踢過嚟」，實情3D電視的觀賞效果係點？今日開始大家可以免費親身感受得到。Sony將52吋3D BRAVIA電視、內置未公開新版本Firmware的PS3遊戲機、3D影像測試碟、3D Demo遊戲加上特製Active Shutter 3D眼鏡帶到香港，在銅鑼灣及尖沙咀SonyStyle作即場示範，暫定公開試睇一個月，唔睇就真係蝕底！

電影球賽遊戲樣樣有

今次示範的3D內容分別有3D足球比賽、PS3遊戲《Wipeout HD》、《Motorstorm》同Blu-ray電影《美食風球》，3D電視除了可配合3D影音器材（Blu-ray機或PS3遊戲機）外，亦能夠「即時」將2D訊源轉換成3D畫面，只需一按電視遙控器上的「3D鍵」即可升級，實試效果唔錯，只差在試唔到將高清電視廣播節目轉換成3D畫面，如果可以睇3D版女主播報新聞確實係高享受。最後要提提大家示範地點中3D眼鏡數量並唔多，相信同一時間只能安排幾位人士體驗3D電視，有心到SonyStyle睇睇的朋友，就預咗要排隊。

Sony Active Shutter 3D眼鏡有多個顏色版本，但今次到港就清一色係黑色。	實試以全3D製作的《Wipeout HD》，速度感、流暢度跟3D效果都十分突出。	示範裝備為52吋3D BRAVIA電視、PS3遊戲機跟BDP-S550 Blu-ray影碟機。

全高清3D畫面

Sony 3D電視採用Frame Sequential Display技術，需配合Active Shutter 3D眼鏡先能睇到，而且擁有真正Full HD畫質3D效果。3D電視對於報紙等平面媒體嚟講，係冇法子用圖片表現出畫面有幾「立體」，因為3D影像係透過左、右眼所接收到的不同影像在腦內組織出畫面，如冇佩戴對應的3D眼鏡只會睇到重疊的「鬼影」。

只要一按電視遙控上的「3D鍵」，就可將2D訊源升級做3D畫面。	《Uncharted 2》只係2D遊戲，但利用3D升級轉換技術下，景物的立體感夠突出。	若不佩戴3D眼鏡或只用相機拍攝，3D畫面會變成重疊鬼影；佩戴3D眼鏡才可睇到立體畫面。

試播一個月

早前有牌子推出四十幾吋3D LCD顯示屏賣七萬幾元，這部52吋3D BRAVIA電視開價幾多？Sony話產品型號、價錢及推出時間均未有答案，而今次所展示的Sony 3D示範，跟歐、美、日大型影音及遊戲展覽的配套差唔多一樣，可以佩戴Active Shutter 3D眼鏡欣賞到3D足球片段、Blu-ray電影片段以及PS3遊戲，而且大家可以現場試玩3D PS3遊戲，真正體驗它的威力。

這段足球比賽實情是2D拍攝，但經升級後，景深都出番晒嚟，人多時情況更明顯。	《美食風球》將會在今年內推出3D Blu-ray影碟，現在將可率先睇到預告片。	今次主要以PS3做示範，但要升級Firmware先能夠對應3D輸出，新Firmware將會在下半年推出。

撰文：布偉倫

攝影：陳世昌

查詢電話：2345 2966