陳逸璇與Rosemary前晚出席欣賞音樂劇《舞動寶萊塢》，逸璇表示一直想到印度體驗當地文化，她說：「有朋友去過當地參加婚禮，誇張又華麗，仲出動埋大象添！我都有朋友喺當地，希望有機會出席佢哋嘅婚禮，啲舞蹈好特別，去到學吓跳舞。」

陳逸璇說新年會留港度過：「父母會去泰國旅行，我同墨國男友留港，佢話畀個驚喜我。我會去學整蛋糕，再親自下廚。」她不諱言已有訂婚計劃：「男友話今年訂婚。（認定係佢？）感覺好啱，最重要搵個錫自己嘅，佢好錫我。聖誕同除夕同男友去墨西哥探佢家人，不過去到病咗兩三日，又暈又好似抖唔到氣咁，因為海拔太高。（想唔想生個混血兒BB？）如果結婚會考慮，但又想享受二人世界。」

Rosemary嚮往印度

Rosemary則表示稍後會出席一個印度舞會，可藉此吸取服裝的靈感，她對印度十分有興趣，但未有機會去當地旅行，她說：「我有好多朋友喺印度，佢哋叫我一定要去，因為感覺好神聖。當地女仔好靚，我好鍾意其中一個女演員，佢喺荷里活好出名，對眼綠色。（當地有乜吸引？）文化，不過大部分朋友去到都唔多習慣，會病，我自己都有少少驚。」