【張嘉敏北京直擊】熊黛林最近於新片飾演野蠻女友，坦言自己現實中也有任性的時候，希望男友會氹自己多點，不過她就指對住城城發唔出脾氣，認真自相矛盾！

日前模特兒公司STYLE假北京舉行周年派對，旗下一眾名模包括熊黛林（Lynn）、姚予晴及劉丹等均以性感打扮示人，更和經理人Kim相擁合照，氣氛融洽又熱鬧。

任性係女仔嘅專利

Lynn最近忙於拍攝馬偉豪執導的新片《我的野蠻女友2》，問她是否野蠻女友？她就說：「個角色唔係好野蠻，係古靈精怪、任性同曳曳，男朋友唔聽話就郁手。（你都任性？）任性係女仔嘅專利同特權。」Lynn又笑言最任性時是刻意唱反調：「依家大個咗就唔會，只係會撒吓嬌。（睇對手？）我唔鍾意啲好易畀我恰到嘅男仔。」至於會否氹番向自己發脾氣的男友，她表示：「睇吓點，有時候人都係鍾意畀人氹，唔可以次次都係人氹我，十次佢氹我九次，我氹番佢一次啦。」

問Lynn會否跟城城為角色作排練？她坦言：「唔可以搵身邊朋友試，我會發唔到脾氣，要真拍先會投入角色。我今次都要喊，我喊得出o架，投入到角色嘛。」

Lynn作狀跟經理人Kim咀嘴，場面搞笑。

劉丹在派對上玩遊戲。

姚予晴紅底贈男友

另外，專程到北京出席派對的姚予晴，透露花了一千元人民幣購物，包括預備在新年時穿的紅底：「我呢兩年都有買，旺嘛，都有買埋畀男友Sunny，逼埋佢着，一齊旺。其實我想佢旺過我，見另一半搵到，自己都開心。」