每個星期日，愛血拼的媽咪都會帶我逛商場，Shopping完又Shopping，好齋！

上個星期日，去咗尖沙咀一座新商場，居然有得玩Hiking，好得！

講大話甩大牙，我梗係唔會呃人啦！呢個商場搵咗一班Art人進駐，變成半個藝術館，展出多組雕塑及裝置，仲設計咗一條遊覽路線叫「Hiking Arte」，一邊Shopping，一邊接觸藝術，作為親子活動，咁先有意思嘛！

呼吸藝術空氣

K11，唔係巴士線，亦唔係連鎖便利店，而係今日參觀的目的地，內裏有唔少藝術搞作，包括雕塑、大型裝置，當中又以總值逾HK$2,000萬嘅「K11 Kollection」最為矚目！作品運用大樹、樹葉、種子、雀鳥、野馬等元素，引領觀眾反思人與自然的關係，並且話畀大家知，藝術同生活可以係零距離。

此外，場內各店舖之間設有18個藝廊，仲串連成一條參觀路線叫「Hiking Arte」，沿途指示牌的設計抄足郊遊徑，十分搞鬼。首個「Hiking Arte」就展示咗多組以人與自然山水為主題的藝術作品，讓一家大小吸呼新鮮的藝術空氣。

「藝廊」其實係櫥窗，讓不同藝術家有機會發表作品，跟公眾交流。	18個「藝廊」散布商場不同角落，令藝術與生活走在一起。	「倒影」 「K11 Kollection」作品之一。懸掛於半空的彩鳥，口中叼着手袋、公事包，形態如商場內自由購物的遊人。
「鳥來投林」 另一件「K11 Kollection」作品，利用彩膠、鋁材及不銹鋼製成的立體壁畫，以野生雀鳥隱藏於熱帶雨林為題材，令人聯想起幾近絕迹於鬧市的雀鳥。

撰文：何詩敏

攝影：盧展程、黎劍華

模特兒：思行

查詢電話：3118 8070