點樣去形容SEGA新RPG遊戲「End of Eternity」？基本上用一個「型」字就夠。型男索女不在話下，而且仲可以不斷為主角換上各款潮牌服飾，十足十行緊Fashion Show；再者一時又雙槍，一時又跳起倒豎葱開機關槍，好Matrix！

隨時換潮牌新衫

好多玩家玩過《FF XIII》，評語係畫面確實靚，但玩落冇乜新意；而呢套由tri-Ace同SEGA共同開發的原創角色扮演遊戲《End of Eternity》，就應該有啲新鮮感。遊戲背景是近未來世界，地球因污染及地軸變動而變得破落，玩家要在一個充滿鋼鐵同齒輪的巨大機械裝置世界冒險。型男索女主角係日系角色扮演的大方向，單睇今次三大主角Zephyr、Vashyron同Reanbell的造型，同《FF》有得揮，更好係加入同類遊戲少有的換衫系統，可以買衫換裝，再落場打過。而且廠方仲搵來幾個日本潮流單位幫手，如「Tokyo Alice」、「feebee」等，官網更差不多日日Update主角們着新衫的靚樣，真係恨死好多潮童。

齋開槍一樣過癮

以往玩RPG，主角都離唔開用劍、刀或者魔法攻擊，今次《End of Eternity》就只係畀大家用槍，就算埋身戰都一樣。雖然設定唔多合理，不過抵讚係各主角玩槍都玩得幾型，諗得到的型仔開槍Pose都落齊，當中最型係跳起再轉身倒豎葱式開槍，以RPG可以做出如《Devil May Cry》的動作感覺，水平都算幾高。就算遊戲主要以槍戰為主都唔會覺得好悶，因為大家可以改裝武器，組裝出適合自己的攻擊組合。

《End of Eternity》更引入一個全新的攻擊系統，有「真損傷」同「假損傷」，「真損傷」的意思係攻擊時能真正扣除敵人的能源，但每次只扣得少少；而「假損傷」每次可以扣去更多能源，不過能源值係會隨時間回復，所以最佳攻擊方法係先用「假損傷」再用「真損傷」，先至能夠打低敵人。

儲氣出超必

遊戲採用半即時制「tri-Attack-Battle」系統，於回合制中加入各種即時動作，在戰場上隨意控制隊員，玩落都幾得意。每個角色都有自己的時間計，在指定時間內自己走位、出招同防備，而且各方敵人亦可以同時對你出招，既要打人又要走位閃避，並拉開空檔畀隊友接力攻擊，夠晒忙。除一般攻擊之外，仲可以使出名為Invincible Action的強力攻擊，設定攻擊路線去使出型到震的槍戰動作。而當攻擊路線穿越另外兩位同伴時，更可以儲低Resonance Count，儲得咁上下可以三人攜手出超必Resonance Attack，場面華麗到好似玩緊《無双》，唔講都唔知玩緊RPG。

撰文：布偉倫