混血名模Mandy Lieu與陳柏霖拍拖三年，兩人一直表現恩愛，不過昨日Mandy單方面宣布與男友因聚少離多而分手，但強調並非出現第三者，現時二人「降呢」成為好朋友！
Mandy與陳柏霖07年撻着，此後經常被傳媒拍得當街煙韌，十足連體嬰般，兩人更早已視對方為結婚對象，惜戀情維持三年便玩完。昨日Mandy身穿Salvatore Ferragamo 2010春夏新裝出席品牌舉行的Incanto Bloom香水活動，起初本想隱瞞分手一事，最終還是大方承認。問到農曆新年如何度過？她說：「今年會第一年喺香港過，我契媽會喺馬來西亞嚟香港一齊過年。」那會否與男友陳柏霖一起度歲？她本來說柏霖要拍戲，但當記者再三追問何以過年也沒有假期時，她才頓了一會說：「其實我哋分開咗，呢個係我哋兩個人嘅決定，（點解？）畀啲空間我哋啦！（係咪因為成日分隔異地？）可能係。」
冇講非君不嫁
記者指二人分手十分可惜，Mandy沒有回應，但就說：「我哋仍然係好close嘅朋友，呢個係我哋兩個人一齊做嘅決定，我哋仲好尊重對方。」去年柏霖曾被拍得與台灣氣質美女桂綸鎂夜遊台灣而傳出緋聞，不過Mandy就強調二人分手並非因為第三者。
回復單身的Mandy坦言感到不習慣，她續說：「要慢慢適應，每日生活都有好多變化，（想唔想快啲搵新男友？）冇諗，我想畀多啲時間自己做嘢。」對於曾表明非君不嫁的她昨日就反口說：「我冇講過一定會結婚！」問到今年情人節會否感寂寞？她笑說：「唔會，有契媽陪，我會帶佢去行花市，（順便行埋桃花？）唔會刻意。」
經理人轉口風
記者致電陳柏霖經理人，惜二人未有夾口供，其經理人說：「冇咁嘅事，亂寫啫，柏霖依家喺台灣休息，過年會陪爸爸媽咪。」當得悉分手是由Mandy親口宣布時，經理人也表現驚訝：「係咩？等我了解吓先！」其後再致電記者，指未能聯絡柏霖，但就承認很久沒有碰見二人在一起，口風即時轉了。
文：名人組