尋日講完因為貿發局安排失當，搞到我個日本朋友有飛竟然入唔到場睇時裝騷，今日就等我畀幾個建議貿發局啲搞手啦！

第一，千祈唔好輕視一個時裝騷，好多時衰咗都係因為以為自己搞過做過有晒經驗而輕視個騷，以我自己為例，每一個騷我都盡心盡力去做，唔會因為有經驗而掉以輕心，因為你知道每一個騷都會是不同的情況，經驗不代表你可以搬字過紙。

第二，做事細心一點，一個騷有好多好多鮮為人知的瑣碎事要做，人手點安排，場面點控制，出咗事邊個話得事做決定，唔係話搞個騷就剩係叫啲模特兒着住啲衫行囉！周邊有好多嘢要顧及，如果唔係就會畀人話你安排失誤、招呼不周㗎啦！隨時成為人家的笑柄話柄！

第三，要識執生，做人做事搞騷都是一樣，規矩是死的，人是生的，要識變通。

第四，要有兩手準備，做騷會有好多突發嘢發生，所以騷前一定要有應變方案，如果無咪好似嗰日全部人企晒係場外，不過個騷已經開始咗囉！

講真，搞個騷出嚟，搞到咁多捧場客唔開心又激氣嘅，為咩？所以搞騷的，是有責任要做好個騷，包括你貿發局！

時裝設計師