洪杰（前名：扈佳榮）07年從美國返港發展歌唱事業，成為英皇男新人，希望打好歌手基礎的他全心工作，感情方面則未有着落。

早前洪杰欣賞舒淇主演的內地電影《非誠勿擾》，在片中他看到「誠意」兩字，令他憶起過去的一段感情，感觸良多：「戲名好有意思，叫人冇誠意嘅話就唔好嚟打擾。」在美國時他有個台灣女友，不愛做第三者的他清楚知道她已跟男友分開後才展開追求，但拍拖不久，有天在對方的車上發現一個蛋糕，女友解釋買來悼念逝去的婆婆。「我對女友投百二分信任，梗係信晒佢啦，點知陰差陽錯畀我發現佢講大話，個蛋糕係送畀藕斷絲連嘅舊男友，當時我好難過，佢竟然搬埋過身嘅婆婆出嚟講大話，因為呢件事最後我哋分咗手。佢未搞清楚同舊男友關係，唔係真心嘅話，就唔應該答應我嘅追求！」洪杰說。