謝安琪（Kay）入行五年由「箍牙妹」進身天后級，多年來風雨不斷，09年被負面新聞重重圍剿猶如走鋼索般步步驚心，向來堅持自我的Kay說：「我會繼續做好自己，因為我相信音樂力量會令個世界靚啲！」
08年Kay的《鍾無艷》、《囍帖街》唱到街知巷聞，09年的成績就如她的新碟《SLOWNESS》般，稍稍放緩，但宏觀看世界的Kay說：「成績唔係講個人目標，如果一個藝人好努力只係為咗喺呢行留低，做咩豐功偉績都好，都只係為自己而做，畀我寧願紅歌唔紅人，唔鍾意我呢個歌手唔緊要，可以令人鍾意我首歌，做到聽完首歌有啲諗法或者啟發，先係一個歌手嘅存在價值。」小時候她經常聽林憶蓮的《只可活一次》，歌詞中的「不管風雨，是成敗也好誰能預知際遇？」正是Kay的信念，由原本不知有何意義，到不知不覺間已經入晒腦。
彈或讚都多謝
09年Kay備受整容、走音、婚外情等負面新聞打擊，更被新世代最厲害的聲音——網友狂插，自言是小女人的她淡然招架：「我唔會覺得委屈，講真都唔知係咩人啲網上討論，背後動機係乜？我唔想深究，亦唔會花好多時間去睇，不過我知網友嘅批評好闊，好似我張新碟《SLOWNESS》，有人覺得唔似謝安琪唱開嘅，又有啲人覺得我唱來唱去都係嗰啲，其實人人口味唔同，如果係真心討論，咁無論讚定彈我都會好多謝，起碼有人留意，仲會Take Time去留言喎！」
如果只為追求更好的生活，Kay不會選擇做歌手，她說：「大可用做歌手嘅努力去炒股，肯定發咗啦！我堅持，因為我真係相信音樂會令整個世界靚啲！」
不懂輕鬆回應
外間有指Kay「好寸」兼扮大牌，即使在壞新聞充斥的一年，她對傳媒態度未有改變，甚至仍Keep住係朋友：「我唔信啲好炒作性嘅傳媒，不過呢啲又唔係個人仇殺！」她不懂得「爆料」包裝自己，不懂得將說話變得富娛樂性，更為部分記者訪問她時被迫以難堪字眼問回應，都明白不關記者的事。Kay說：「左麟右李都向我教路，好似克勤成日叫我回應唔好咁正經，諗句嘢笑咗就算，校長都話講乜都得，笑下咪得囉，但我真係唔開心就會話『係架，好唔開心』，我唔識放輕鬆，亦唔鍾意用呢啲嚟講笑，除咗認真回應，仲會同公司商量可以做啲咩。」
同屬「自我派」的王菲即將復出，喜歡王菲的Kay自然開心：「阿菲好自由自在、隨心所欲、好藝術，佢好似個神話。（會跟佢嘅路向發展？）我唔敢咁諗，但做番佢做過嘅嘢，人哋會覺得扮王菲，謝安琪應該做番謝安琪！」
撐住謝安琪的……張繼聰和張贍
「我成日都同啲新入行嘅人講，如果屋企人唔支持好弊，我都有諗過唔再唱歌，反而我另一半（張繼聰）鼓勵我留低，佢真心覺得我應該要唱落去。至於囝囝（張贍）咁細，仲未知道父母嘅工作，佢覺得其他同學嘅父母都應該成日喺屋企個電視度見到，哈！」
謝爸爸謝媽媽
「佢哋好支持我，有啲唔好嘅新聞出現，就會同我講『唔好放喺心』、『唔好激氣』，佢哋從來冇問過我呢啲新聞，佢哋好放心我，亦都好明白，話晒對咗我幾十年喎！」
真心撐朋友
將近完成訪問之際，Kay說：「係喎，我有套戲三月就上啦，係曾國祥同尹志文合拍嘅，佢哋籌備咗幾年終於上畫，真係好戥啲好朋友開心，呢件係我今年最期待嘅事！」
專訪亦不忘為好友新片宣傳，這個圈，真心撐朋友的人不多，謝安琪應該是那少數中的一個！
文：音樂組
攝影：馬永堅
化妝：Andy Leung@ Make360.com.hk
髮型：Derrick Ng,Winky@ P.O.P. hairdressing
場地：Macro Polo Hotel