日前去睇貿發局搞嘅香港青年時裝設計家創作表演賽，簡直係笑話一則！竟然有好多人有飛都入唔到場！仲要開咗騷都無人出聲，要手持有效門票嘅人白等，你話係咪笑話！有飛都無得睇，連場都入唔到，咁啲飛究竟係咪仲係飛嚟？

最後終於都等到貿發局嘅人出嚟，解釋係因為個場太爆，所以唔畀大家入！哈哈！又多一個笑話，咁有冇人諗過如果爆場嘅應變係點？聽聞呢個騷年年都搞，唔係連咁簡單嘅應變方案都無吖嘛？貿發局認真令人失望……

其實我為參賽者的爸爸媽媽慘，以為可以睇到自己個仔女的設計走上天橋，誰不知撲個空！仲要排咗咁耐隊，唔係因為遲到無得入！你話係咪慘！老人家都算啦！有專登嚟睇騷的日本人都入唔到，你估人家覺得你貿發局的安排有冇問題呢？

最後點收科？勁囉！一人送西太后杯一隻，話本來是VIP的禮物……嘩！認真厚禮！

你會問點解我會咁清楚？因為我朋友咪就係入唔到去嘅日本人囉！

朋友話無得睇其實都唔係咩損失，不過，朋友講咗一句：我去歐洲、紐約時裝周睇騷，都未試過有飛入唔到囉！

時裝設計師