羅拔迪尼路於新片《幸福窩天倫》飾演老父，因為與子女欠缺溝通而關係生疏，但現實中的他，兒孫滿堂，更自認教子有方！

記＝記者　　　　羅＝羅拔迪尼路

記：你之前有冇睇過由馬斯杜安尼主演嘅意大利原著電影《天倫之旅》？

羅：睇過一次，其實我自細就鍾意馬斯杜安尼，成日睇佢嘅戲，佢拍過好多好電影，好多都有傳統的意大利色彩，不過我覺得《幸》同《天》其實好唔同，導演Kirk Jones拍出自己嘅風格。

記：身為爸爸，你有冇覺得同戲中角色有相似嘅地方？

羅：我有五個仔女同埋兩個孫，拍戲時都會將所有有聯繫嘅都帶到角色之上，所以當然會有好多相同之處啦。

記：對比戲中角色，你認為自己爸爸又係點？

羅：我阿爸比較開放，尤其係對於我想做嘅事情，雖然阿爺比較古老，又係傳統嘅意大利人，但阿爸來美國之後就變得開放，對於我嘅成長仲好開通。

拍檔出色

記：咁你自己作為爸爸又如何？

羅：我嘗試唔好咁嚴厲，不過有好多事情都一定要佢哋（仔女）做，有時我會同佢哋理論甚至爭吵，就好似要同佢哋討價還價，要佢哋聽從某些事情，其他嘅事便不會對他們有太多的要求。

記：呢個方法有冇用？

羅：雖然都有唔work嘅時候，但整體都幾好嘅！

記：今次同祖娜芭莉摩亞及姬蒂碧金莎合作愉快嗎？

羅：佢兩位都係非常出色嘅演員，仲有Sam Rockwell同埋導演Kirk，成組工作人員都相處得好開心，尤其在外景拍攝時，大家都互相照顧，就好似大家庭一樣。

樂意分享

記：身為前輩，你有冇畀意見佢哋？

羅：老實說，我真係唔介意畀意見，單係計年齡已經夠晒經驗，所以如果佢哋問我意見，我都好樂意分享，只係唔想做到好似個囉囉嗦嗦嘅阿叔咁。

記：其實你個人比較鍾意獨立電影（即《幸》），定係大電影公司出品如《非常外父》系列？

羅：真係好唔同，拍大電影有多啲時間，多啲資源，外景車都多幾部。

記：講起《非常外父》，聽聞你會演第三集喎！

羅：哈哈，我哋拍攝緊啦！叫《Meet The Little Fockers》。

祖娜主動建父女情

於《幸福窩天倫》飾演羅拔迪尼路女兒的祖娜芭莉摩亞，接受訪問時表示與「阿爸」好有feel，皆因她在拍攝時，好努力去建立二人的父女關係，她說：「我哋成日一齊食飯，我就成日捉住佢或者翹住佢隻手，對佢做啲小朋友嘅行為，我覺得咁樣可以建立我哋之間的聯繫。」

祖娜對於可以參與《幸》表示榮幸，她說：「真係好開心可以參與呢個咁感動嘅旅程，好多朋友睇完之後都感動到喊！」

文：外娛組