12/01/2010

播放本新聞相關短片

親子園遊會

「文仔,由朝到晚對住遊戲機,你唔悶嘅咩?」

「姐姐,有得玩又點會悶呢?」

「我嘅意思係,遊戲要互動先好玩,孤軍作戰,開心極有限啦!」

「打機又唔係打交,點樣互動呀?」

「先搞清楚,玩遊戲同玩遊戲機係兩回事!跟姐姐去公園,我帶你體驗吓乜嘢係真正好玩嘅遊戲啦……」

舊「戲」玩一番

勤有功,我Buy!戲無益?就好值得商榷。近日,民政事務局搞咗個社區藝術計劃,當中有項環節叫「傳統遊戲新玩」,將摺飛機、踩高筒、跳麻包袋等興極一時嘅遊戲帶返入公園,畀一家大小齊懷舊、齊Enjoy,並藉着遊戲嘅互動性,拉近親子關係,改善人際溝通。

遊戲工作顧問Kitling指出,好多人以為玩物一定喪志,忽略遊戲嘅存在價值。「其實只要遊戲有互動元素,小朋友就可以從中學習與人分享。部分遊戲涉及體能活動,又可訓練小朋友手眼協調、身體協調等。另外,部分遊戲要無中生有,小朋友需自製道具,可令他們學懂珍惜。」講多無謂,行動最實際,大小朋友們,Let's Play!

Game 1 跳麻包袋

傳統遊戲好多時都係就地取材,簡簡單單一個麻包袋,已經可以玩個不亦樂乎!

Game 2 跳橡筋繩

一圈連一圈,造成一條橡筋繩,由兩個小朋友各扯一端,把它拉成直線,其他小朋友就要想辦法跳過它,簡單又有挑戰性,最啱喜歡跳跳紮嘅小朋友!

Game 3 彩虹傘

一張彩虹傘可以有多種玩法,小朋友瞓上去又得,喺傘下走嚟走去又得,好處係人多先玩到,仲要講求合作性,唔慌冇機會互動喇!

Game 4 踩高筒

講求手腳配合同平衡力嘅遊戲,看似好簡單,但要小朋友成功踏出第一步,都唔係咁容易o架!

Game 5 雪條棍飛鏢

玩具唔一定要畀錢買,DIY仲好玩喇!好似用3根雪條棍、4條橡筋,再加幾支顏色筆,就可製造出飛得遠遠嘅飛鏢,你又有冇興趣試吓呢?

Game 6 摺飛機

只需一張畫紙、幾支顏色筆已玩得,問題係:點先可以摺到一架飛得又高又遠嘅飛機呢?係時候用吓腦喇……

幾時有得玩?

以上介紹嘅親子遊戲,其實幾時都可以玩,如果想同多啲人一齊玩,可參加「傳統遊戲新玩」呢項活動,詳情如下:

日 期:1月24日

時 間:2:00pm

地 點:香港公園茶具博物館草地

日 期:1月31日

時 間:2:00pm

地 點:九龍公園天台花園

查詢網址:www.buddingwinter.hk

撰文:何詩敏 攝影:郭凱敏 模特兒:Zen(Kaleidoscope)、譚絡文