有咩咁好玩

本文重點

早幾日，諾諾與琳琳同屋企人去咗洪水橋附近郊遊散步，忽然傳來一陣咩咩聲，過咗一陣，竟然喺路邊發現一頭羊咩咩。「荒山野嶺無端端會有隻羊，一定有古怪……」一行4人決定玩跟蹤，沿途見到N咁多隻羊，仲以為去咗新西蘭，究竟羊從哪裏來？好快就有答案……

原來洪水橋有個「羊咩咩樂園」剛於元旦日登場，佔地15,000平方呎，園內養百幾隻羊咩咩，有白羊、黑羊、啡羊，仲有黑白混色羊，真係以為自己去咗外國牧場呢！據悉，園主丘德安乃廚師出身，得老友送來3頭山奶羊，結果轉行做牧羊人，並找來黑山羊配種，羊世家從此開枝散葉，他亦舉家搬入元朗，方便照顧一眾羊仔羊女。

現時樂園已對外開放，參觀者可嘗試親自餵羊咩咩食草、食粟米，從中了解羊仔羊女嘅日常生活，仲可以用奶樽餵羊，兼抱羊仔拍照！想體會放牧樂趣？就不可錯過黃昏放羊時間。園主每日都會帶同自家訓練嘅「牧羊犬」唐狗大頭，趕羊上山吃草、散步，雖然山路崎嶇，但可以近距離見到羊咩咩傻更更吃草嘅樣子，都算值回票價。

負責接待參觀團體的教育總監石國強稱：「自從荔園結束後，港人已甚少機會接觸農場動物，希望大家可以在探望羊仔的過程中，增加對動物及大自然的認識。」

外形粗獷的園主，談到自己的羊咩咩，即一臉柔情。	餵羊咩咩食草，機會唔係經常有！	每日傍晚，唐狗大頭就會變身「牧羊犬」，帶着羊群上山。
木瓜樹長得很高，要摘就要爬高啲啦！	園內嘅有機菜田，畀大家嘗試種菜嘅滋味。	想睇孔雀先生開屏？畀啲耐性啦！