鍾欣桐（阿嬌）在休息一年間，默默自我增值，學唱歌、演戲、跳舞，從沒有自我放棄或鬆懈，出碟時機終於成熟，阿嬌稍後將推出「單飛」EP碟，快歌《心多》正是她邁向舞后的試金石。
重新起步
阿嬌相隔兩年，首度以暫別Twins的名義，推出收錄了六首廣東及國語歌的EP碟，但單是錄音已花了半年時間。阿嬌自言這張EP具雙重意義，既是「單飛」又是「復唱」後的第一擊，令她感到緊張多於壓力：「因為我有一段時間停咗冇錄音，要再花時間去適應錄音室，（唔慣冇蔡卓妍（阿Sa）喺身邊？）咁又唔會，因為以前我哋都係分開錄音，呢個唔係最大問題。」新碟可算是她在樂壇重新出發的第一步，不過阿嬌笑言沒有做新人之感：「我入行已經踏入第九年，好難再做新人，不過都有重新做起嘅感覺。」
挑戰難度
心願做武打女星的阿嬌，同時也醉心跳舞，新碟第二plug的快歌《心多》，似為阿嬌做跳舞天后度身訂造。今次阿嬌機不可失，特請得Sunny Chan排舞，雖然在鏡頭前，她只僅表演三分半鐘的勁歌熱舞，表面看似「easy job」，但事實上她為練好這隻舞曾徹夜失眠，可謂有苦自己知：「其實首歌啲舞都幾難跳，歌又快，step好多、好難記，最慘係我學識咗就立即去上海做嘢，第二晚就要返香港錄《勁歌》，根本唔夠時間練。」
通宵練舞
為求第一次表現完美，阿嬌惟有用iPhone錄下Sunny與dancers的舞步將勤補絀，到完成上海的工作後，阿嬌即飛撲返酒店通宵練舞，她謂：「嗰晚我不停翻睇啲片，自己一個人喺房度通宵練，因為又唱歌又跳舞，都好嘈，好彩冇人投訴。」
未知是否「即食難消化」關係，在最後綵排時，阿嬌狀態本尚算理想，但一roll機時，她竟然發「舞瘟」，腦裏突然空白一片，歌詞舞步統統忘得一乾二淨，幸好經冷靜後，阿嬌重組記憶，才得以順利表演，不過已嚇得她「心都離埋」。她事後檢討說：「好驚……好驚……！好在都跳到，但可以跳得好啲囉。其實以前練舞時間都唔多，好似我哋Twins開演唱會，試過十四日就要排晒成場演唱會啲歌舞。」
即席試rap
阿嬌的新曲有兩個版本，首次與MC Jin（歐陽靖）合作的她，錄了廣東跟英文版，廣東版主要作為錄影及拍MV之用，而英文版就會收錄在新碟中。問阿嬌喜歡哪個版本？她笑說：「英文版啦，感覺型啲，廣東話版啲歌詞我覺得好搞笑囉。」阿嬌隨即rap一段：「剛剛收到個call，又要去錄音室錄新歌。rap乜嘢好？都未清楚，或者我根本諗多咗，一啲都唔出奇。唔諗得太多靈感自然會嚟，責任係避無可避，但係壓力係自己畀自己。」她竊笑說：「rap嘅內容，我覺得係MC Jin心聲，唔係我嘅，大家唔好誤會。」
恨搞簽唱會
在休息的日子裏，阿嬌曾跟容祖兒的唱歌老師學唱歌，並自感上堂後唱功進步不少，發音亦明顯較以前準繩，令她更有信心重戰歌壇，她說：「真係唱得好咗，可能同休息多咗有關，我覺得我個人ready晒。」不過，阿嬌稱收到公司通知因內地工作不斷，故可能新碟宣傳時間不多：「我都想搞簽唱會，因為我都成兩年冇搞過，不過搞唔搞得成就要睇公司啦。」
睇片偷師
阿嬌近期積極練舞，為增進舞技，她的iPhone內下載了不少巨星的跳舞MV，方便隨時隨地「睇片學跳舞」，偷師對象包括同門師姐、師弟，還有三位美國炙手可熱的天王巨星。
米高積遜：我最欣賞當然係佢獨創嘅Moon Walk舞步同台風啦，佢嘅巨星風采，會永遠留喺每個歌迷心目中。
Britney Spears：我好鍾意佢個《Crazy》MV，着住件tube top跳舞嘅佢好型！仲有佢嗰招踢腿踢到好高，好勁！可見佢落咗唔少苦功練舞。
Justin Timberlake：我鍾意佢，唔係因為佢係Britney嘅ex，只係覺得佢跳舞好有個人風格，感覺好輕，仲有佢好鍾意着西裝跳舞，但一樣跳得好勁。
容祖兒：呢位唔使多講啦，大家都知祖兒跳得好，佢喺《逃》MV，模仿MJ嘅經典傾斜45度，睇到我「嘩嘩」聲。
陳偉霆：佢係香港新一代舞王，我覺得佢喺《戰士》MV裏面啲舞步好good，尤其擴胸動作，嘩！型到殺死人。
採訪：音樂組
攝影：沈健程
場地：中環one bar