近年港漫市場低迷，不少出版社都要重著經典以維持生計，但此法只能吸引老一輩讀者，要令其他讀者重投港漫熱情，原創故事才是王道。畫壇巨匠黃玉郎便先知先覺，事隔10年再推出原創漫畫《春秋戰雄》，今次連孔子都要打，且看能否繼《天子》、《神兵》後，再創銷量神話。

打盡友情牌

《新著龍虎門》、《神掌龍劍飛》、《黃玉郎醉拳》，近年玉皇朝都是翻新經典再重出，為何在銷量不錯的情況下，黃生又突然再出原創作品呢？「計一計數，我上次出原著故事已經係1999年嘅《神兵玄奇》，今年港漫市場開始復甦，自己就手痕想搞多本新書出喇！」事實上，《春秋戰雄》的確精英雲集，不僅黃生會由頭跟到尾，還有邱福龍做人設、林業慶勾頭，加上文敵編劇，未看外界反應已期待萬分。

主角非大好人

黃生曾以皇帝故事為題，創作出《天子傳奇》系列，如今《春秋戰雄》亦以春秋五霸之秦穆公為主角，故事似乎有點熟口熟面。「唔同，主角勝公子只係一方霸主，勉強嚟講只算諸侯，唔係皇帝。而且佢由人中龍變地底泥再爬番起身，性格亦正亦邪，做事不擇手段，又唔係個個女仔鍾意佢，跟以往逢主角就係大好人嘅形象好唔同！」黃生更表示會落重墨水在人性刻畫上，而且今次連孔子都玩埋！「畫得春秋冇理由唔講佢，根據史書記載，孔子係能騎擅射，文武雙全，咁當然佢唔係最好打啦！但都有一定篇幅講佢。」

有機出電影

《黃醉》已逝，《春秋》將至，黃生預期《春秋戰雄》會連載100期，以兩年作結，但原來漫畫只是頭炮，背後還有滿腹大計。「只要留意吓啲人設同故事，會發現當中不乏Online Game元素，希望將來可進軍遊戲界，甚至好似《龍虎門》咁有電影、電視劇面世。」另一個問題，讀者最關心有冇贈品送。「呢啲梗係唔少得，我哋已預咗PS3、iPhone送畀讀者，過年前後仲會送勝公子9吋Figure同『萬碎』合金斧頭，總之加埋就過百萬蚊啦！」

《春秋戰雄》故事率先睇

秦國三公子嬴任好，自小天資聰穎，19歲已連勝99仗，就在人生最高峰、國君之位唾手可得之際，第100仗非但中止了他的連勝紀錄，甚至一夕之間由天之驕子淪為蠻族奴隸。最後再憑天賦及奇遇，打敗墨家外道墨尊明鬼，重登王位，成一方霸主……

資料：營業資訊