香港人一年四季都愛打邊爐，所以火鍋店都開到成行成巿，不過既然來到真正的火鍋季節，當然要精挑細選才可享箇中風味。像最近於深水埗天悅廣場開設的火鍋店，一鍋坊間少見的粥底火鍋已贏盡口碑，兩位火鍋達人范振鋒（Ricky）及梁靖琪（Toby）試過後，都大讚身心即時溫暖。

肉類蔬菜選擇達70款

輝叔火鍋店可謂明星火鍋店，其尖沙咀總店為不少藝人經常光臨之地，這次開設分店於舊區，為街坊將價錢下調近三成，但食物依然保持一貫水準。當中以湯底作最強招徠，除了招牌鮮茄薯仔粒牛肉湯底外，冬日之選有香辣的冬蔭公、四川麻辣、暖身的花彫醉雞、豬肚胡椒等13款選擇之多。不過最受Ricky和Toby歡迎的，當然是坊間少見的粥底火鍋，特別是用上兩隻大蟹熬製個多小時而成的水蟹粥底，大廚表示軟綿綿的粥底盡是蟹的鮮甜味道，為食物加添鮮香之餘，粥更會包裹食物，讓食物入口更軟滑。而食物方面，對於Ricky一類食肉獸來說，澳洲雪花和牛、美國及本地手切肥牛，還有新西蘭羊片及鹿兒島黑豚豬等都是必點食物，可憐Toby近年患上皮膚敏感，牛肉、海鮮一類都要戒清，幸好食店足有10多款豆腐類及近20款蔬菜，又怎會怕餓親？

水蟹粥底 $68 大隻水蟹加入大蜆、瑤柱及果皮等熬煮，大廚建議用來烚牛肉一流，不過記緊邊烚邊攪拌，以免煮燶，當然別忘了將粥底吃掉，食盡精華所在！	墨魚滑 （前）$68 、蝦滑 （後）$88 兩種滑分別選用新鮮大墨魚及海中蝦，全由自家打製而成，下點點葱花及鹽吊味後，味道更鮮甜。	好味韭菜餃 $38、西洋菜餃 $42、豆苗餃 $42、鮮蝦水餃 $38 各式餃子由廚師每日新鮮包製，確保皮軟餡靚，備有全素餃及菜肉餃系列，單一叫一碟8隻分量夠。
蟹子/芝士墨魚丸 $68、蟹子/芝士蝦丸 $78 將蟹子及芝士分別釀入墨魚肉及蝦肉中，製成自家包心丸，前者入口中心部分脆卜卜，後者煮熱後變得流心，呈現兩種口感。	自製四寶丸 $48 四寶丸包括蝦丸、墨魚丸、豬肉丸及鯪魚肉丸，款款都是手打而且即叫即製，入口更爽勁彈牙。	澳洲雪花和牛 大$198、例$128 澳洲入口的靚和牛，雪花油脂均勻，牛味亦濃，輕輕烚過後依然滑身軟腍，大家絕不能錯過。
刺身三寶 $98 香港人總愛在打邊爐的同時，嘗嘗新鮮刺身，這裏就提供多款刺身，包括三文魚、海中蝦及北寄貝等，平衡一下口味。	深水埗店比尖沙咀店大一倍，地方寬敞舒適，特別設有卡位及貴賓房，無論想兩三小口邊食邊談天，或大班人喧嘩暢快地搶食都無問題。

撰文：黃穎妮

攝影：郭凱敏

查詢電話：3575 9222