Angelababy（楊穎）與陳偉霆（William）的緋聞傳足多年，一直疑幻疑真，最近突然傳出二人分手的消息，更有指他們另結新歡。不過事後「雙魚女」Baby在網誌發表星座論，揚言跟天蠍座的人「好夾」，令人估計她跟屬天蠍座的William翻撻成功。其實Baby已認定天蠍座為她的最佳伴侶，直認被天蠍男眼神吸引。愛浪漫的她又自爆男友曾答應娶她，但就要她等至少十年，令Baby非常激氣！
十個女孩中有九個都情迷星象命理，Angelababy正是當中的第九個。早前她在網誌上以「雙魚座」為題發表星座論，其中「愛幻想、愛浪漫」，正正是雙魚座的她的寫照。Baby說：「愛情觀方面，我絕對係典型嘅雙魚座，細細個已經期望有段浪漫刻骨嘅愛情，而且我可以為對方犧牲，所以睇小說同電影嘅時候就好容易墮入角色，有時睇完仲會無啦啦唔開心。其實雙魚座特別多愁善感，好情緒化又經常自相矛盾，做唔到決定，而且當我唔開心嘅時候唔會想畀人知，所以同我拍拖嘅人最好要夠細心同有幽默感。」
問她以前跟男友之間的甜蜜事，Baby甜笑說：「之前有個男朋友講甜言蜜語時話會娶我，當時我真係開心到暈，但佢轉頭就同我講叫我等佢十幾年，即時咩氣氛都冇晒。」
跟蠍子天作之合
在Baby的星座文章中，她直指跟天蠍座「好夾」，碰巧緋聞男友William亦是天蠍男，因而傳出William「箍煲」成功，另一天蠍座緋聞男友黃曉明即時被打入冷宮。當再次追問「天蠍座的人」是否指William，Baby就故意轉移話題說：「之前同鄭中基拍戲都有傳過緋聞，其實我覺得連話係電影宣傳都有啲牽強，係人都知鄭中基同我一樣都係雙魚座，佢身邊多年嚟唔係有個天蠍女咩？因為雙魚座特別容易畀天蠍座眼神吸引，而蠍子又好欣賞充滿愛心嘅雙魚，所以呢兩個星座嘅人感情特別好。」
雖然Baby不斷強調雙魚跟天蠍是天作之合，但始終未肯透露情歸哪位「天蠍男」。她坦言現在工作愈來愈忙，莫說是談戀愛，連想與朋友見面都未必有時間：「有時返到香港都要做嘢，想同朋友一齊睇場戲嘅時間都冇，只可以食個快飯、見個面就走。」
經理人居功至高
今年Baby撇甩o靚模之名，以「潮模」自居，事業亦愈見順利，更成功打入日本市場。不過她表示雙魚座的人從不喜歡鬥爭，做事亦容易受環境影響。究竟令這個「和平天使」如何在競爭激烈的模界生存？當中最功不可沒的，就是Baby所指「會跳出來幫我解決問題的天蠍」，她的經理人Kim。
Baby說：「當我知道有機會加入日本Avex，有好多嘢我都做唔到決定，好在屬天蠍座嘅Kim好有決斷能力為我安排好晒。其實今年拍寫真Kim都有監場，佢一發覺有衫唔啱，就即刻幫我拒絕，令拍攝進度好順利，畀着係我就一定唔識點同人講。不知不覺間我好依賴佢，所以我依家有咁嘅成績，有一半功勞係佢嘅。」
後記：典型雙魚座
Baby對星座深信不疑，自稱屬典型的雙魚座，在訪問中她就流露出雙魚的特質。首先在記者極力追問下，Baby都未有為與William的戀情表態，可能就連這條「小魚兒」亦未作出決定，正正符合雙魚座猶豫不決的個性。而當訪問完成後，Baby帶着令人難以抗拒的甜美笑容問記者：「你係咩星座o架？」然後開始發表其「星座論」，這種極具社交手腕的能力，也是雙魚女獨有的。
文：鄧倚淇
攝：黎志輝
服裝：金鐘西武