o靚模鍾蕙芝（Lavina）和胡心諾（Rainbow）昨日齊齊推出性感床上用品，對於推出的人形攬枕被指抄襲周秀娜，兩女忿忿不平，揶揄對方產品粗製濫造，又暗寸其產品「炒冷飯」循環再用。
一連四天的「亞洲遊戲展」昨日揭幕，一班o靚模各出奇謀爭見報，其中Lavina和Rainbow為宣傳床上用品，在大庭廣眾穿上性感睡衣及赤腳現身，而為答謝fans通宵輪候，更特別送上牛奶及三文治給頭兩位粉絲。被問到性感打扮會否怕引人犯罪？Lavina說：「唔怕，如果咁着可以吸引到多啲人買就梗係好。」
期間Lavina主動向傳媒大吐苦水：「有人話我哋抄襲人哋嘅人形攬枕，其實我哋大半年前已經打算出，一路冇推出係唔想呃fans，因為我哋唔係好似人哋咁求其用個膠袋笠住就算，所以我哋絕對唔係抄人，咁講白費晒設計師嘅心血，Sunny用咗好多心機落去，呢啲報道好委屈！」
拒揀暴力男友
Rainbow聽罷亦加把口說：「總之我哋唔會呃fans，唔會炒冷飯，求其搵啲舊相擺上去。」問到兩人是否指周秀娜？兩女沒有正面回應。另外，談及崔建邦疑打女友鄺敏慧（中巴），Lavina表示曾與中巴合作，覺得對方很nice，又認為男人不該打女人，更笑言：「揀男友會唔會謹慎啲？我揀男友要識按摩，咁就可以攻擊我啲穴位。」Rainbow則謂不會選有暴力傾向的男友，又覺得女孩子應被愛錫。
周秀娜懶回應
此外，前晚周秀娜以美人魚造型為庾澄慶演唱會拍攝MV，穿上金色bra top的她，被掛於半空中不斷擺出游水動作，但胸部卻離奇地沒有太大晃動，令人稱奇。而昨日她出席遊戲展，對於Lavina與Rainbow暗寸她呃fans？她不屑地說：「多謝佢哋嗰番偉論，我就送番online game首主題曲《龍鱗》畀佢哋，（咩意思？）即係乜都唔要。」問她會否買兩女產品及到訪其攤位，她表示沒興趣，更寸爆謂：「我唔得閒理佢哋！」
文：名人組