《Final Fantasy XIII》維持一貫靚仔靚女主角同超靚嘅CG動畫，而今集最驚喜嘅係戰鬥同成長系統做得更細密，加上新登場型到震嘅召喚獸，等足3年咁耐，今個聖誕假唔煲盡佢真係對唔住部PS3！

畫面超靚 玩法刺激

《Final Fantasy XIII》故事發生喺機械文明天空城市「繭」同原始地上城市「脈衝」之上，遊戲中主角喺呢個舞台上肩負起守護世界同改變命運嘅使命。《FF XIII》用新版本Crystal Tools引擎開發，遊戲畫面同視覺效果都大大提升。遊戲戰鬥畫面同樣有水準，遇到敵人時採用無縫式方式轉換至戰鬥畫面，喺氣都透唔到嘅情況即時戰鬥，都唔好話唔刺激。

新世代ATB 更考腦筋

以前ATB動態時間戰鬥系統要喺ATB計用完之前上達唔同指令；而今集唔同指令係會有唔同損耗值，影響ATB計嘅流失速度；要有效運用有限嘅ATB計就要花多啲心思，鬥快又鬥計仔，少啲腦汁都玩唔掂。

《FF XIII》另一新點子係用立體化結構嘅水晶石成長系統，大家可以將打低敵人所賺得嘅水晶點數配置喺水晶唔同層面上，以達到唔同嘅能力，想先強化基本戰鬥力或增加特殊技能都得；而且戰鬥時更可以透過新加入嘅Optima系統，即時轉換角色職務，因應形勢以最強組合出擊。

召喚獸 有睇頭

《FF》系列仲有一個極強賣點——召喚獸，好多玩家都係因為呢一點而瞓身《FF》；雖然到呢一刻仲未公布晒所有召喚獸嘅品種，但已公布嘅都好有睇頭，如主角之一Hope嘅召喚獸係身形龐大嘅機械人Alexander，可以從遠處召來零件搭建成裝有炮台嘅堡壘，加上佢一雙鐵拳真係好有霸氣！

銅鑼灣率先試玩

即日起到12月17日，SCEH會喺銅鑼灣SOGO對面設有《Final Fantasy XIII幻想之壘》，逼到入去就有機會率先試玩遊戲。SCEH同時喺展期中舉辦《Final Fantasy Cosplay大募集》，扮得好就有機會上亞洲遊戲展大舞台參選，機會相當難得！

地點：銅鑼灣怡和街1~1L號香港大廈地下A1舖（SOGO對面）

日期：即日至12月17日

時間：10:00am~10:00pm

遊戲資料

類型：角色扮演

開發：Square Enix

平台：PS3

推出日期：12月17日

售價：$649（遊戲）、$3,248（PS3主機同捆版）

查詢電話：2341 2356

撰文：布偉倫